حياتي اليوم صحيفة إلكترونية يومية
الجملة دي كنت بسمعها كتير أوي وأنا صغيرة، وكنت مفكره إن كل دورى في الحياه هو الفستان الأبيض اللي اصبح للأسف في بعض الزيجات كفن وليس فستان عرس.
وفي الغالب البنات بتكتشف دا متأخر في بداية حياتها بتكون فرحانه جدا بفكره الدبلة والفستان الأبيض والفرح وإن الجواز هو الهدف الأساسى للحياه ودا معتقد أصبح عقيم للغاية بالرغم من إن الجواز دا شئ مهم لتكامل المودة والرحمة والألفة بين الطرفين ودا اللي حث عليه ديننا العظيم وجميع الأديان السماوية..
لكن الغلط عندنا من البداية احنا اللي فهمنا ولادنا المعنى غلط قبل ما نفرحهم بفكره الزواج نوضحلهم مدى مسئوليته وانه محتاج لشجاعة وقوة ومرونة في التفكير إتجاه مسئوليات الحياة ولبناء بيت وأسرة بالمعنى المتكامل ونوضح للشباب ان فكرة إن يكون ليك شريك في الحياة فكرة كلها شمولية وحب ودفء مش مجرد حب إمتلاك للشخص عشان نطلع عليه جميع العقد المكبوته جوانا..
وللأسف الأغلبية من الرجالة إلا ما رحم ربى بيخاف من فكرة الإرتباط بالبنت اللي ليها طابع خاص بشخصيتها ..اللي دايما متصالحة مع نفسها بشكل يخوفك.. اللي ممكن تقولها كلمتى فلان تعد تحكيلك الموضوع من أوله من غير ما تقولك عمري ما كلمت ولاد.. ليه دايما بنشوف قوه الشخصية والجدعنه لفظ مرتبط بالذكورة فقط؟ وان البنت عشان تكون أنثى بالمعنى المتكامل لازم تكون ضعيفة ومكسورة وطول الوقت تحت رجلك.. ليه مش بنحاول نقويها بدل ما نكسرها؟ وللأسف النوع دا من الرجالة بيكون متناقض مع نفسه بشكل يخوف.. وعايز طول الوقت واحده يكسر فيها ووقت ما يقع يحتاج اللي تشيله ودايما في ضهره !
نزار قبانى حسم الموضوع بجمله حلوة أوي وليها عمق كبير.. وهي: "لا تخاف من الإرتباط من امرأه قوية ربما يأتى يوما وتكون هي جيشك الوحيد ".. نصيحتى لكل بنت: قبل ما تفكري في الارتباط فكري الأول في المعنى، وانك إزاى تعرفى تحترمى وتوصلى الحب اللي جواكى لجوزك من غير ما تلغى شخصيتك أو احترامك ليه، حاولى متكونيش مجرد تابع لانه مع الوقت هيمل من شكل العلاقة وهيدور على اللي بتسانده وتكون ضهر ليه في عز الازمات..
ونصحتى لكل راجل: فكر بجد انك تختار نصك التانى صح ومترضاش بأي نص وخلاص.. نصك اللي بتحتاجه في جميع مواقف حياتك بلاش فكرة امينة وسيى السيد، وافتكر دايما إن الكلام الحلو في العلاقة بيكون ليه تأثير كبير علي نجاحها.. أوعى تقول مش بعرف اقول كلام حلو.. دينا بيقول الكلمة الطيبة صدقة.. كلمة واحدة ممكن تغير وتمحى تعب يوم كامل في حياتنا فياريت نريح بعض!
