حياتي اليوم صحيفة إلكترونية يومية
فى ستات كتيره وأنا منهم بتتصادم مع جوزها أو خطيبها فى أمور صغيرة جدا ولما بنسيب المشكلة ومش بنحاول نوصل لحل فيها بتكبر مع الوقت لحد ما نلاقى نفسنا وصلنا لمرحل احنا فى غنى عنها أنا مع الوقت بدأت افهم دماغ سى السيد جوزى
تعالى معايا كدا واحده واحده وأنا اقولك دماغ الباشا عاملة إزاى .. أول حاجه بتكون السبب فى مشاكل كتيرة بينكم هى" صراع الأفكار" بمعنى :
دايما بتكونى بتتكلمى مع جوزك وتلاقيه مش مركز معاكى أو بيتجهلك ساعتها طبعا بنضرب البوز اياه ويجلنا نوع من الإستفزاز والخنقة وبتكونى ساعتها مش عايزه تكملى كلامك.. ومن هنا هوب تقوم المشكلة حضرتك بقى الرجل فى الوقت دا معزور لان دماغ الرجل مكون من عده صناديق صغيرة جوه صندوق كبير ومن ضمنهم صندوق اسمه اللا شئ..
الصناديق دى غير متلامسة ببعضها ولكنها مرتبطة بالصندوق الكبير ياعنى ساعتها كان فى صندوق من الصناديق الموجودة داخل عقله.. ولما بيجى يخرج من صندوق لصندوق تانى عشان يركز معاكى بيحصله حاجه من الإتنين يا يتعصب يا أما ياخد وقت لحد ما يتأقلم ويركز معاكى دا غير بقى صندوق اللاشئ ودا بيحصل لما بتلاقى الرجل سرحان ومركز فى حاجه وتيجى تسألية يكون رده بمنتهى التلقائية ولا حاجه وفعلا بتكون حقيقة ودا الصندوق اللى بيهرب ليه الأغلبية من المشاكل والأزمات ياعنى ساعتها الرجل معزور مش مطنشك ولا حاجه..
لكن بالنسبة لتكوينا احنا العقلى غيرهم تماما احنا تكوينا العقلى عبارة عن مجموعة من الأسلاك مرتبطة مع بعضهم بكبل كبير أسمه "كبل العاطفة "ياعنى نقدر نعمل ونفكر فى ميت حاجه فى نفس الوقت عشان كدا سهل نخرج من موضوع لغيره عشان كدا دايما بيحصل بينا صراع فى الأفكار ..
تانى شئ بقى يا ستى "الخنقة"
مخنوقة بتاعتنا غير مخنوق بتاعتهم
مخنوق عندهم ياعنى عايز أعد لوحدى ياعنى الصمت التام ياعنى التعبيرات الوش اللى تلاقيهم عكس بعض متخديهاش بقى انه اتغير عليكى واكيد عارف حد تانى ولا اكيد مامته اللى قلبتة عشان كانت عايزه تجوزة سوسن بنت خالتة بالرغم من إن المشكلة اللى عنده مش محتاج مننا كل دا بس للأسف الاغلبية من الرجالة مش بيحاول يلجأ فى الوقت دا لمراتة ساعتها بيكون أول حاجه يفكر فيها هو اللجوء لأقرب حد من الرجالة بيفهم فى النوعية دى من المشاكل لأن الرجل الشرقى بطبعة مش بيحب يبان ضعيف قدام المرأه بوجه عام ..
عكسنا احنا تماما مخنوقة عندنا ياعنى عايزاك تغمرنى بعطفك وحنانك وإهتمامك مخنوقة ياعنى اسألنى مالك لحد ما أقولك واتحايل عليا كمان كذا مره وساعتها بيكون الرجل هو أول حد بتلجأ لية المرأة عشان مش عايزه غيره يشوف ضعفها وهى دى مشكلتنا مع بعض دايما كل واحد فينا بيكون متوقع من التانى رد فعل اللى نفسة فيه ومستنية منه والطرف التانى بيرد بالطريقة اللى هو شايفها صح دايما بنجى على بعض أكتر ما بنفهم بعض ..
عشان كدا نصحتى ليكم فى النهاية ياريت كل واحد فينا يحاول يفهم ويقرب للتانى وبلاش العادات والتقاليد الشرقية اللى بسبب فهمنا الغلط ليها خلنا دايما فى صراع خوف الراجل من انه يبين ضعفة قدام الست عشان مينفعش يبان ضعيف قدمها وفهم الست الخاطئ لضعف الرجل امامها على انه شخصية ضعيفة ومهزوزه مش على انه إنسان فى الأول والأخر من حقة يتعب ويعيط وينهار طالما كلنا فى مركب واحده ياريت نقودها سوا بس نقودها صح عشان نقدر نوصل بحياتنا وولادنا لبر الأمان من غير خوف ولا عقد نفسية!
