داليا جمال تكتب: وختامها…بيزنس!

ده كتير ..كتير كده والله على أعصاب المصريين!!
أثيوبيا أعلنت عن اعتزامها إنشاء سد النهضه على أراضيها لتخزين مياه النيل…المصريين ماكدبوش خبر ..قلقوا بصراحه..وأعلنوا إعتراضهم وامتعاضهم ..أثيوبيا ماسألتش.!! المصريين بصوا من تحت لفوق وقالوا للأثيوبيين إخص عليكم يا وحشين !
المصريين افتكروا أثيوبيا بتهوش…أثيوبيا عملت مناقصه واشتغلت فى السد بجد
المصريين استهزئوا بأثيوبيا وقالوا..احنا أصحاب 7000سنه حضاره وهنقطعكوا !!
الأثيوبيين ..ردوا على المصريين وقالولهم خليهم"8000سنه" واحنا بقى ولاد النهارده وهنوريكم. !!
المصريين ..ولا همهم ،وهات يا هرى ونكت فى نفسهم ،وهات يا تصريحات عنتريه
أثيوبيا.. ما سألتش فى المصريين وقالت إنهم فنجرية بق ،وعملت تحالفات وتربيطات مع إسرائيل وتركيا والصين علشان تمول السد .
المصريين ..لقوا الحكايه جد ،وأخيرا بطلوا ضحك واتخضوا.
المصريين ..أقالوا وزير الرى ،وجابوا وزير جديد اسمه (المغازى ).
أثيوبيا.. قالت للمصريين انتوا زعلانين ليه ؟ تعالوا نتفاوض ونتفاهم واحنا هنريحكوا خالص .
المصريين ..بلعوا الطعم وفضلوا رايحين يتفاوضوا..راجعين يتفاوضوا ، "ورقصنى يا جدع ".فات كتير؟ فاتت سنه ،والتانيه…!!
الأثيوبيين …بيبنوا فى السد والتمويلات نازله عليهم زى المطره.
المصريين.. اشتكوا للأمم المتحده ،التمويلات وقفت واتجمدت ،والسد بقى سمع هس ،ولا طوبه اتحركت من مكانها !!
أثيوبيا ..جريت عالمصريين قالتلهم شبيك لبيك تطلبوا إيه ؟ المصريين قالوا ندخل معاكم فى تمويل السد ونشترك فى الإداره !!
الأثيوبيين ..قالوا أحب ما على قلبنا ،بس ده مخالف لدستور بلدنا والمركب اللى ليها ريسيين بتغرق. بس تعالوا نتفاوض !!
المصريين..صدقواوراحوا المفاوضات
العالم كله ضرب كف على كف وقالوا يظهر أن الأثيوبيين سحروا المصريين وشربوهم حاجه أصفره!!
المصريين.. وقعوا للأثيوبيين بالموافقه على إنشاء السد!! وأثيوبيا أخدت الورقه وطلعت للمصريين لسانها، وهات يا رقص ،وبناء فى السد .
المصريين.. حسوا بالكارثه أخيرا ، قامت الحكومه قالت للوزير المغازى رد على الجماهير القلقانه، قام المغازى أعلن عن اكتشاف جديد خطير ،عباره عن بير ميه كبير عرفوه المصريين من55 سنه فاتت يكفى المصريبن 100سنه جايه !!
الأثيوبيين ..قالوا للمصريين مبروك يا فالحين مالكوش حجه ،ومافيش قضيه! المغازى بتاعكم قال إن عندكوا ميه كتير ومش محتاجين مية النيل.
المصريين قالوا بس ده ما يصحش واحنا جيران وان ما رجعتوش عن السد احنا هنزعل بجد !!
الأثيوبيين قالوا…زعلانين إزاى واحنا اللى بننفعكم !!
المصريين ..رفعوا حواجبهم وتعجبوا قائلين بتنفعونا ده إيه منك ليه !!
الأثيوبيين قالوا..الحديد والأسمنت اللى بيبنوا السد بتقدمهم لنا شركات مصريه ، وأعمال شبكات الكهرباء للسد بتنفذها شركه مصريه ، والشركه اللى بتنقل كل مواد البناء للسد ..برضه مصريه!!
المصريين بصوا لبعض وسألوا إيه ده ؟ الكلام ده هزار ولا جد !!
الأثيوبيين ضحكوا ضحكه ساخره وقالوا…ابقوا اسألوا "المغازى" .
المصريين قالوا..عوضنا على الله..والإيد اللى ما تقدرش تقطعها "بوسها "وابعت شركاتك تعمل معاها شغل ويبقى ختامها "بيزنس "!