حياتي اليوم صحيفة إلكترونية يومية
حتكلم انهارده عن الحب عن طريق الفيس بوك، وهل هو حقيقة ولا وهم وهل أصبح "الفيس بوك" مرادفا لـ"الحب بوك" ولا "الخراب بوك" وطبعا كل واحد فينا حيشوفه من وجهه نظره، ومن خلال إستخدامه هو للنت.. أنا عن نفسي أعرف ناس من خلال الفيس بوك بحس إنهم أصدقاء ليه وأفضل من ناس كتيره عرفتهم في الحقيقة.. بس دايما بعتبر الفيس دا عبارة عن مسرحية كل واحد بيحب يمثل الدور إللي نفسه يعيشه علي الحقيقة.. لأن الأغلبية دايما بيحب يظهر بعكس إلا جواه.. يعني ممكن ألاقي حد في الحقيقة شخصية.. وعلي الفيس شخصية تانية.. بحس إنه شوية ويركب له جناحات ويبقي ملاك!
أنا بعتبر الفيس دا سلاح ذو حدين ..أو كعملة ليها وجهين.. وكل واحد بقى هو إللى في إيده يستخدم السلاح اللى يناسب شخصيته وطباعه وتربيته..وبعتبر الفيس دا أسوأ وسيلة إتصال علي مستوي العالم لأن نسبة الإتصال فيها 7% طبعا الناس اللى دارسين تنمية بشرية حتوصل فكرتي ليهم بسهولة.. ولما نجي نفكر بالعقل والمنطق مينفعش إني أحكم على شخص من خلال كلمات ومشاعر مزيفة يصدرها لي بالشكل الذي يروق له.
أما بالنسبة للشباب والبنات إللى بيحبوا بعض من خلال الفيس وبعدين يتجوزوا وتفشل العلاقة ..فشل العلاقة دا بيبقي علي حسب إختيارتهم لأن العلاقة الناجحة بتكون ناجحة سواء من الفيس أو غيره.. بتكون ناجحة من خلال صراحتنا ووضوحنا أمام الآخر.. وبلاش دور الملائكة إللى كلنا عايشينه.. ساعات بشوف علاقات ناجحة عن طريق الفيس ودا بيكون بسبب إختيارهم هما للطريقة إلا حبوا يظهروا بيها قصاد بعض من غير أقنعة!
لكن طبعا مش كل الناس كدا.. الحب شئ جميل بس الأجمل إننا نختار صح.. وبلاش التسرع في أخذ قراراتنا المفرطة.. والحاجة بقى إللى بتستفزني هي الصفحات الإجتماعية بلاقي البنت باعتة مشكلة وبتطلب من الأدمن عدم نشر إسمها.. وبتبتدي عرض المشكلة علي العام وبشوف الناس كلها إتحولت لفلاسفة ومحليلين وساعات قضاه.. وكل واحد يصدر حكمه ..وطبعا دا بيخلي صاحبة المشكلة تحتار أكتر ما هي محتارة!
ولو بصينا للجزء التاني إللى بيستخدموا الفيس بوك بشكل خاطئ تماما.. لما أشوف واحدة مخطوبة أو متجوزة وبتشيت مع الشباب علي النت سواء على سبيل الهزار أو عن طريق تغيير الواقع المؤلم إللى عايشينه.. والكلام برده للشباب ..إنتوا مفكرين إن دا شئ عادي وتكنولوجيا بقى.. وتغيير واقع.. وطالما مش بشوفه ولا بكلمه فون يبقي كدا حلال!
أنا عايزه أوضح إن دي خيانة بمعناها المتكامل..ولو كنتي واخدها على سبيل الدردشة أو الهزار أو التسالي انتي ممكن تتسلي بحاجة مفيدة.. أو علي الأقل حاجة تخلي ليكي كرامة..
يااااريت نرجع نقعد ما نفسنا شوية.. ونغير كل معتقد خاطئ إحنا شايفنه صح.. أو بمعني أصح عايزين نشوفه صح ..عشان نهرب من واقع مؤلم من غير تأنيب ضمير!
