حياتي اليوم صحيفة إلكترونية يومية
غابة كثيفة الاشجار..ظلام ممتد بعد منتصف الليل ..قرود واقفة علي الشجر بس الغريب انها ما بتلعبش خايفة ومترقبة شيء ..القمر غايب بس مستخبي في السحاب الضوء اللي جاى منه بسيييط يادوب مبين ملامح القرود وعنيهم ماليها الخوف ..الارض مليانة ورق شجر اصفر كما لو كنا في الخريف بس الشجر لسه برضه كثيف الضلمة متعانقة مع الشجر على امتداد البصر كما لو كانو بيرقصوا مع بعض " سلووو " .
في وسط الغابة.. في عابد بيصلى غرقان في صلاته لحد التوهة ، يمكن من فرط علاقته بربنا ويمكن بعيد وبيحاول يقرب.
في ضوء جاى من بعيد اشبه بنقط صغيرة ..ايه دا دى عربيات يا ترى مين اللي فيها ورايحين فين؟..يمكن جايين يصطادوا القرود دى ؟..يمكن جايين يبنوا خيمة ويعيشوا في الغابة ؟..يمكن جايين يقطعوا الشجر دا كله ويسيبوا الغابة عريانة من غير معنى؟
في طريق على اليمين فيه أسد جاى منه بحنية وقلق، يشوف ايه القلق اللي في الغابة دا، يستكشف مين العربيات دى وليه القرود خايفة كده.
فيل ضخم جدا عمال يدب برجليه دبات عنيفة من برة القشرة الأرضية في نفس المكان ..زلزال 9 ريختر!
