حياتي اليوم صحيفة إلكترونية يومية
العيلة هى أمانك وظهرك وسندك…. يابخت من ليه حد يخاف عليه ؟ العيلة يعنى الراحة والأمان…يعنى لما تبقى فى شده … هتلاقى اللى يسندك … فى اللحظات الصعبة .. تلاقى عمك او خالك … او اخوك فى ظهرك..و كمان فى لحظات فرحك … سعادتك هتكتمل بأهلك واقاربك حواليك….!!
اتعودنا وتربينا على ان العيلة هى عزوتك … هى حمايتك .. يعنى مابينكم الحب والرحمة والسكينة ….. يعنى الكل يخاف على بعض .. ويعمل حساب للكبير والصغير …!!
لكن للأسف الواقع اللى مفروض علينا … غير كده … كنا بنسمع دايما مقولة " الأقارب عقارب" !
يعنى اقرب انسان ليك …. هو أخطر عدو ليك… اللى يعرف عنك كل حاجة… دا عدوك الاول… أغلب البشر الخلافات اللى بينهم بتبقى جانب مادى … ومن جانب تانى خلافات مورثة …. او نزاعات على ميراث…. وحاجات مين دى كتير… !!
يعنى بنخسر العيلة عشان خلافات على ميراث , وحقد وغل وحسد فى القلوب… على أمور تافهة , او خلافات فى وجهات النظر تورث للأجيال القادمة… ويزرعوا فيهم الحقد والغيرة … وتبقى وصلة من الخلافات مستمرة…..بقينا مفتقدين صلة الرحم !!
وطبعا النزاعات كثيرة على الجانب المادى.. " الميراث" الله سبحانه تعالى…جعل الميراث وسيلة للترابط الاسرى… وجود الرحمة والسكينة فى قلوب البشر….لكن البشر غيروا القاعدة وجعلوا الميراث وسيلة للحقد والجشع والاستغلال…. وبقى الميراث من أسباب المشاكل اللى بتحصل بين الاقارب.
جعل الله منهجا فى تقسيم الميراث بالشرع فى كتابه العزيز قال تعالى: "لِّلرِّجَالِ نَصيِبٌ مِّمَّا تَرَكَ الْوَالِدَانِ وَالأَقْرَبُونَ وَلِلنِّسَاء نَصِيبٌ مِّمَّا تَرَكَ الْوَالِدَانِ وَالأَقْرَبُونَ مِمَّا قَلَّ مِنْهُ أَوْ كَثُرَ نَصِيباً مَّفْرُوضاً {7})سورة النساء
وبعدين جينا احنا "نحلل الحرام… ونحرم الحلال" … يعنى العم يستولى على ميراث أولاد اخوه ..أو الاخ يأخد حق أخته لانه شايف انها مش من حقها الميراث…فين العدل… والرحمة والمودة والسكينه اللى في قلوب البشر..؟
من الأمور الى بتخسرك عائلتك , وتصدق مقولة الأقارب عقارب, الحسد والحقد والغل …. خلافات بتوصل لحد الانتقام …. مش مجرد خلاف بسيط على شوية فلوس لا دا ابشع من كده.
لما نقابل وجه كريم … محدش هيأخد الفلوس والبيوت والاراضى معاه…. لو نفكر فى ربنا … وازاى بنظلم بعض… ونيجى على بعض…. ونخسر كل حاجة عشان "الفلوس" ….هنلاقى قد الحياة تافهة…. ومش مستاهلة كل الحقد والكره ده.
يبقى غير المثل " الأقارب عقارب" يبقى بينكم مودة ورحمة… أوصل الرحم مع أقاربك أو أهل بيتك …وخلي بينكم سكينة ومودة بجد… انزع انت الخلافات .. فهمهم معنى صلة الرحم … ان لا يدخل الجنة قاطع رحم..وان الحياة مش مستهلة كل المشاكل والخلافات دى … الحياة أبسط من كده … لو كل واحد عارف حقوقه وواجباته …
الله سبحانه وتعالى أمرنا بصِلَة الأرحام فقال تعالى: (وَاعْبُدُوا اللَّهَ وَلا تُشْرِكُوا بِهِ شَيْئًا وَبِالْوَالِدَيْنِ إِحْسَانًا وَبِذِي الْقُرْبَى وَالْيَتَامَى وَالْمَسَاكِينِ وَالْجَارِ ذِي الْقُرْبَى وَالْجَارِ الْجُنُبِ وَالصَّاحِبِ بِالْجَنْبِ وَابْنِ السَّبِيلِ وَمَا مَلَكَتْ أَيْمَانُكُمْ إِنَّ اللَّهَ لا يُحِبُّ مَنْ كَانَ مُخْتَالا فَخُورًا) (النساء/ 36).
