حياتي اليوم صحيفة إلكترونية يومية
حياتك عبارة عن أشخاص ومواقف
طول ما انت عايش بتقابلك ناس كتيير مواقف اكتر
وانت لسه صغير بتبقى مش فاهم ومدرك اوى اللى بيحصل بتبقى عايش مش شايل هم عايش كدة وخلاص.
اما بتكبر شوية علاقاتك بالناس بتكتر، فى اللى بيبقى قريبين منك، فى اللى علاقتك بيهم سطحية، فى اللى علاقتهم بيك لمجرد المصلحة وبعدين مع السلامه!، وفى برضه اللى تفتكره قريب منك لدرجة كبيرة وعشرة سنين وتكتشف في الآخر انه "ولا حاجة"!
تحس انك اتهزيت ومش قادر تصدق اللى حصل فتقع، ومعاها تتهز ثقتك فى كل الناس حتى أقرب الناس ليك..متبقاش مصدق، متعرفش تفرق.
طيب مين الصح ومين الغلط .. مين الكويس ومين الوحش؟
حاسس انك تايه.. فتقرر انك تقف مع نفسك واقفة جامده
لا..بس انا قررت انى هقف على رجلى تانى مش هخلى اى حاجة ولا اى حد يكسرنى بعد كده.
هقوى نفسى بنفسى..مش هحتاج مساعدة من حد
مش هعتمد ولا هستنى حاجة من حد
مش هعلق املى ولا اتعشم فى حد
هعيش لنفسى..هعمل اللى نفسى فيه
هحقق وأثبت نفسى فى الحاجة اللى بحبها
مش هوقف حياتى على أشخاص بتروح وتيجى
"كلنا مراحل فى حياة بعض"
اللى موجود معاك دلوقتى بكرة مش هيبقى موجود.
يا إما مشاغل الحياة هتبعده يا إما هيبيعك مع اول فرصة او مع اول حد يشوفه انه احسن منك.
صدق ان محدش باقى ليك إلا نفسك.. نفسك وبس!
اللى يبيعك، يظلمك، يخونك
ارميه ورا ضهرك وامحيه من ذاكرتك.
قوى نفسك وانجح واوعى تقع
عشان تثبت لهم انك لسه قوى وموقعتش لما سابوك.
خليهم يندموا انهم بعدوا عنك في يوم من الأيام
عشان قدام شويه هتشكرهم
هتقولهم شكرا بسببكم خلتونى ابقى احسن
واشكرهم كمان مرة.. عشان بسببهم وبسبب اللى عملوه معاك فتحت عينك على حاجات كتير وفهمت حاجات اكتر من غيرها كنت هتفضل زى ما انت لسه على عماك ومش فاهم الدنيا ماشية ازاى.
