حياتي اليوم صحيفة إلكترونية يومية
وقفت قدامك يا بحر واشتكيت، يا ترى هترد عليا ولا هترجعنى زى ما جيت، بيقولوا عليك غدار وفيك طبع القلبان، زيك زي كتير من الناس، موجهم بيكون هادى، وفجأه يعلى من غير أسباب!
لكن الغريبة، لما أقف دايما قدامك برتاح، وببكى براحتى وانا واقفه قدامك وبعيده عن كل الناس، يا ترى ممكن تقلب عليا فجأة، وتيجى موجه تغرقنى وانا واقفه، ولا هصعب عليك وتسبنى اشكيلك همى براحتى زى ما أنا حابه، واقولك على المستخبى جوه ف قلبى؟
ومش مهم يا بحر إني ألقى حل لشكوتي، المهم انى اكون فضفضت واستريحت، واروح بيتى وانا واثقة ان سرى لسه مستخبى، اتقلب ف وسط موجك ومحدش عرفه غيرك..
أمانة عليك يا بحر: متطلعش قلاب وتخيب ظنى فيك زى ما حصل مع ناس كتير قبليك!
