حياتي اليوم صحيفة إلكترونية يومية
"طنط حشرية"..موضوع يزعج الكثيرين ..ومفيش حد منا مقبلش نموذج "طنط حشرية" سواء في شغله أو حياته الخاصة..وأغلبية الناس بتعتبرها الآفة التي تقتل الحياة الإجتماعية بين الناس.. وترهقهم بالأسئلة عن أمور خاصة وأمور لا تعود عليهم بفائدة..!
وللأسف نموذج "الحشريين" أصبح جزءا من منظومة المجتمع..والعديد منا يعاني من هذه الآفة التي تشكل مصدرا للقلق والضجر..وأكثر شئ يصيبني بالإستفزاز ..وبيخليني اتأكد إننا فعلا في مجتمع معاق ومصابين بأفكارنا العقيمة.. لما نشوف واحده متجوزة مش بتخلف، أو واحدة فسخت خطوبتها، ولا واحدة لم توفق زواجها واطلقت..تبتدي بقي مشاكلنا مع المجتمع الحساس أوي بشكل مبالغ فيه..وتبتدي بقي أول مرحلة مع السؤال التقليدي..اللي دايما بيحبوا يسألوه قبل ما يقولولك صباح الخير !
وهو للمتزوجة: "ايه بقي.. مفيش حاجه جاية في السكة"؟..وللأخريات هاتك يا أسئلة عن أسباب فسخ الخطوبة أو الطلاق!
ساعات بييجي علينا وقت بنتكسف نرد أو بمعني أصح بنتخنق من الرد.. لكن اللي نفسي اقوله لكل واحده بتنكسف من الرد: ابقي إستني السؤال دا عشان تعرف تردي ..أهو نتسلي إحنا كمان بقي مادام الناس بتتسلي علينا..وابقي قوليلها جملة واحدة بس:
"محدش في حياتي يعرف حاجة عني اكتر من اللي أنا قررت أقولهاله..ومحدش في حياتي يعرف حقيقة عني أكتر من إللي أنا قررت أوريهاله"!
كل واحد فينا ليه ظروفه الخاصة وحياته إللي مينفعش إننا نحكم عليه لمجرد شوية معلومات لا حتقدم ولا حتأخر..ومن خلالها كل واحد يصدر حكمه علي الناس بمزاجه..
اصدميهم زي ما بيصدموا الناس بالوجع.. وابقي اتفرجي علي وشوشهم وعلامات الإستفهام من كتر الصدمة.. يمكن يتكسفوا علي دمهم!
وفي ناس طبعااااا الطريقة دي مش بتجيب نتيجة معاهم.. فندخل بقي في المرحلة التانية وهي مرحلة "الشفقة مع فضول رهيب"!
ودي اكتر المراحل اللي بتصبني بالإستفزاز.. وطبعا اول ما يشوفوكي تبتدي بقي مرحلة مصمصة الشفايف مع الطبطبة علي الكتف.. وتتقال طبعا الجملة الشهيرة الا بتصيبك بالصدمه ساعتها:
"معلش يا بنتي ربنا يجبر بخاطرك".. وطبعا لو موجودة في اي مناسبة إجتماعية تتقلب حفله عليكي..وهتلاقي بقي النصائح المجهولة و الشعوذة الممنهجة !!
وتسمعي بقي قصص وروايات غريبة الشكل..واللي تخاف علي عيالها منك وتخبيهم ..واللي تخبي عليكي إنها حامل عشان متحسديهاش.. واللي تتخطب بقي وتخبي علي صاحبتها الموضوع دا عقبال ما تتفاجئ زي اي حد غريب بالخطوبة.. واللي دايما تشتكي بالنكد من جوزها عشان تخبي عليكي سعادتها خايفة لتحسديها..!
انا نفسي اقول حاجة للناس المتخلفة المعاقة دي: ياتري بقي كل اللي إنتوا بتعملوه ده فدكم بحاجة؟ أو فاد غيركم؟
ياريت لو كل واحد يفكر في السؤال ده قبل ما يتحول لقاضي وجلاد علي غيره.. وقبل ما يجرح غيره.. وهو مفكر كده إنه بيساعده او بيديله النصايح المهولة!
