حياتي اليوم صحيفة إلكترونية يومية
أغلبنا بيسأل السؤال دا.. لكن الغريب والطريف إننا دايما بنسأله لنفسنا.. وبالذات لما بنكون في قصص حب واقعية..كلنا دايما بنتعامل مع مشاكل غيرنا بمنتهي الواقعية والحكمة والعقل ولكن للأسف مع أنفسنا بنكون العكس تماما ..!
فكروني بفيلم محمد هنيدي لما قال "انا مع كل الناس ديك رومي واجي عندها بطه بلدي"!
وطبعا في صفات كثيرة بتظهر الحب من عدمه..لكن الأهم إنك تقفي قدام نفسك وتجاوبي علي الأسئلة دي..وساعتها لما تعرفي الإجابة هتعرفي تجاوبي علي نفسك ومش هتستني رأي حد..
تعالي نبدأ مع بعض واحده واحده ونفكر بس بصوت عالي.وأول حاجة "إنك لازم تكوني علي طبعتك معاه "..للأسف بشوف أغلبية البنات دايما بتحب الظهور بشخصية عكس شخصيتها.. وهكذا الولد دايما بنحب اللي بيضحك علينا لأننا للأسف دايما بنضحك علي نفسنا وبنظهر بعكس اللي جوانا ودا إللي بيخلينا دايما ننكشف قدام بعض مع أول تجربة أو إختبار.. وطبعا بتكون النتيجة "راسب مع مرتبة الشرف" ومش بعيد ناخد السرير كمان مش المرتبة!
بس ليه دايما مش بنحاول نظهر عيوبنا قدام بعض عشان نعرف نتعايش مع العيوب دي.. مش لازم طول الوقت يشوفك البنوته "الكيوت" الرقيقة اللي بتفطر باتيه ومربي وشاي واللي دايما بتكون مشطبة وشها تشطيب سوبر لوكس وكل واحده وعلي حسب شطاره النقاش اللي بتروح عنده !
وطبعا الولد عشان يشوف نفسه عريس لقطة لازم يكون عنده الشقة والعربية ومعاهم كمان إشتراك الجيم وإلا الجوازه تبوظ !
نفسي نغير بقي نظرتنا للقشور دي ونهتم دايما بجوهر الموضوع .. بالروح الداخلية والشخصية لإن دول إللي هنعيش معاهم طول حياتنا تقريبا..وساعة الجد ومع أول مشكلة هنعرف إن الشكليات دي كانت زي الدهب القشرة ينفع نتزين بيه لوقت محدد وبعد كدا نرميه!
التلقائية والطبيعة دايما بتكون أحلي في كل شئ.. خليكى علي طبعتك اتجنني إفرحي طلع الواد البلطجي إلا جواكي بس مش معنا كدا إننا نظهر عيوبنا من غير ما نصلح فيها ونقول اللي بيحبني يحبني علي كدا لازم نعرف العيوب دي ونصلحها حتي ولو بدأنا بنسبه 25% المهم إننا نبدأ ولازم نعرف قاعده مهمة جدا في الحب
" مش المهم في الحب إنك تلاقي الشخص المناسب لكن الأهم إنك تكوني إنتي الشخص المناسب "!
ثاني شئ هو "التدعيم النفسي"..هو انك تشوفي في اللي بيحبك إنه بيدعمك نفسيا مش واحد كل دوره إنه يصدر قرارات علي الفاضي والمطلوب منك التنفيذ لازم نفرق بين الحب وحب الإمتلاك ..لإن التدعيم النفسي دا شئ بيأثر بشكل كبير علي تكوين العلاقة وتطورها للأفضل ..لإنك دايما بتشوفي الشخص اللي بيساندك وبيساعدك للأفضل ولإثبات كينونتك الداخلية وشخصيتك دايما تحس إنك أقوي وإنتي معاه مش اضعف ..
ثالث شئ "الإهتمام"..ودي بقي تعتبر من أهم الأسباب وافضلها في تكوين علاقة حب ناجحة تحسي كدا إنه واحد عايش عشانك إنتي وبس ..بس مش المقصود بكلامي هنا إنه يكون ليل ونهار معاكي ويسيب شغله ومسئولياته.. والناس اللي ليهم حقوق عليه لإنه ساعتها لو عمل كدا من الأفضل إنك تدوري علي حد تالت يصرف عليكم.. لكن إللي اقصده إن فيه مواقف صغيرة لكن بتفرق معاكي العمر كله وبتأثر في شكل العلاقة تأثير جذري وفعال ولازم نهتم بيها جدا لإن دي مقومات الحب وأساسياته..
ياريت بقى نقدر نفرق بين الحب اللي بجد والحب الوقتي وحب الإمتلاك.. عشان بعد كدا منرجعش نرمي المسئولية في فشلنا علي الحظ والنصيب وتكون دي الشماعة اللي بنعلق عليها ضعفنا قدام نفسنا وسوء إختيارنا ولبسنا للأقنعة أحيانا.
