حياتي اليوم صحيفة إلكترونية يومية
جلس كبير وزراء إبليس في مغارته متململا..ضاجرا بعد يوم عمل شاق يفكر، ويفكر.. لم يقطع صمت خلوته سوي ارتفاع اصوات هرج ومرج وجدال وصخب.
طرقع كبير وزراء إبليس بأصبعيه مرتين فحضر خدامه ومساعديه من فورهم في التو والساعه .
وبنبرة غاضبه سألهم في إيه يا مخفي منك ليه ؟؟
أجابه كبير الحرس : جمهور من شعب الأبالسه جاءوا يقدمون شكواهم يا مولانا.
أمر بإدخالهم ونظر اليهم نظرة فاحصه قبل أن يومئ لعفريت عجوز منهم بأن يتكلم.
قال الشيطان العجوز : يا مولانا ضاقت علينا الأرزاق وجُعنا، بعد ان قررت حكومتك أن تطبق علينا ما فعله البشر في إخوانهم البشر !!
فذقنا الذل وشربنا المر والهوان !! ذبحوا الحمير وأكلنا لحومها مجبربن، فأصبنا بالغباء المبكر، وأصيب بعضنا بداء النهيق، حتي بات صغارنا يرفسون !!
وحتي الحمير استكثروها علينا !!، قلنا ناكل سمك بلاها لحمة، لقيناهم بيأكلوا السمك مخلفات وسبله، أما الفراخ فحقنوها بهرمونات عجيبة علشان تربرب !! فانتشرت الأمراض والعيال بقت تموت قبل ما تلحق تعيش !!
وزاد وغطي إنهم زودوا الجباية علينا !! مش واخدين بالهم إن فينا أبالسه معاشات وأبالسه مطلقات وأرامل وأيتام !!
و حتي مصانع الأدويه قالت ياكش يولع العيانين والفقرا والغلبانين، إشمعني احنا !! مالناش نفس نكسب !! و قفلوا المخازن علي الدوا، علشان يبقي بالغلا والكوا !!
واللي مش لاقي دوا مايصدق يلاقيه ولو بالدين والسلف يشتريه، وشركات الدوا تحقق أرباحا خرافيه بعد رفع الأسعار، وتحولت حياتنا لمرار في مرار !!
بقي الإبليس مننا مش لاقي اللقمة فيجوع ويجيله فقر دم وفشل كبدي وفشل كلوي، وسرطان و ما يلاقيش مكان في مستشفي !! ولو لقي المكان مافيش علاج !!
لا بيشفع لمريض تعبه ولا بهدلة أهله ولا في شيطان بقي قلبه فيه رحمة لأخوة الشيطان !!
والظاهر أن تقليد بني آدم كان وبالا علينا وبقينا بناكل بعض ولا البني آدمين !!
والإبليس مننا لا قادر يعيش ولا مسموحله يمرض، ولو مرض ما يتعالجش، فيتمني الموت !!.. و حتي الموت يا مولانا بقي أمنية لازم نحسب لها ألف حساب لأنهم عملوا رسوم علي شهادات الوفاة !! وزي ما انت عارف يا كبير الموت بيكلف..كفن ودفنه، وخرجه، وعزا وخراب بيوت !!
نظر كبير وزراء إبليس في ذهول وغضب وأجري مكالمة هاتفية مفاجئة صرخ فيها منفعلاعلي محدثه قائلا:
منكم لله يا بعدا… حتي الدوا مستخسرينه في العيانين !!
في الأكل تسمموهم..ومن الدوا تحرموهم.!!
وفي العيا تبهدلوهم !! وحتي في الموت مستكترين ترحموهم..!!
أنا مش قاعدلكم فيها… واستقالتي هتكون جاهزه بكره الصبح.. وأخذ يتمتم غاضبا بإشمئزاز: .. بقيتوا جشعين..بقيتوا بشعين.. بقيتوا زي البني أدمين !!
————–
daliagamal2020@yahoo.com
