تخرج عليك المذيعة المطرودة من قناة إلي قناة تصرخ في جمهور المشاهدين وتؤنبهم قائلة: جوعو..مش لازم تاكلوا، وكفاية عليكم اللي أكلتوه العمر كله..مش لازم تعيشوا..ولا مهم تتعالجوا..ولا ضروري تعلموا عيالكم في مدارس..وعيشوا عيشة أهاليكم..الدولة هتجيبلكم منين !!
وعلي فضائية أخري يبدأ زميلها في النفاق وصلة ردح تقشعر لها الأبدان وهو يقول للمشاهد.» شوف يا حيلتها » »وإللي مش عاجبه البلد يسيبها ويغور !! وكأنها بلد أبوه هو!!
ويصدمك المذيع تخصص صراخ وتنطيط. مؤكدا للناس أن اللحمة مضرة وتسبب النقرس فبلاها لحمة! والسكر بيجيب للناس سكر ..فبلاها سكر !
وتناول الدواجن هيطلع في جلدك ريش..واللي هياكل فراخ هيبقي له منقار فبلاها فراخ !! والشعب عايش في ترف وكسل ورفاهية..فاشقوا واتعبوا واتذلوا …من سكات !
الاعلامي… لما ييجي يكلم المواطن يقوله خليك قنوع .. ولما ييجي يكلم صاحب القناة يقوله خليك سخي !! الإعلامي ..لما ييجي يكلم المواطن يقوله ماتاكلش غير طقة واحدة ولا طقتين .. وكفاية تمرة اوعصير .. ولما ييجي ياكل في البرنامج ياكل »المحمر والمشمر » ! الإعلامي …من دول يقول للناس تبرعوا لمصر وتحملوا الغلاء. ولكنه يحب يعيش »سفلأه » وياكل» سفلأه» ويسافر »سفلأه» !!
الإعلامي من دول يقول للمواطن .. مش مهم مرتبك يقل ولا الضرايب تزيد عليك .. لكنه مستعد يدب كل خناقة وخناقة ويسيب قناة ويروح التانية ويغير قناعاته ويبيع معتقداته مقابل كام ألف جنيه زيادة !! هذا هو حال الإعلاميين في مصر .. ويمكن الكثير من المسئولين في بلدنا .. يأمرون الناس بالبر .. وينسون أنفسهم !! عاوزين الناس تموت بالحيا .. وهم في البغددة ينعمون !! وكم بك يا مصر من مضحكات .. ولكنه ضحك كالبكاء .
—————–
daliagamal2020@yahoo.com