حياتي اليوم صحيفة إلكترونية يومية
——-
يوتوبيا الجميلة حلم كبير راود خيال الافلاطونية
إنسان صادق حلم قبل الميلاد بحلم نادى فيه بالمثالية
وقال نفسي في مدينة جميلة ناسها تفهم معاني الانسانية
مفيهاش جشع ولا غش مفيهاش حِقد ولا عُنصُرية
لكنه مَعَجبش أهل الشر وقالوا عليه مِزَوِّدها شويّة
وفِضل حلم الانسانية يرفرف من جيل لجيل بجناحات عفيّة
حلم اختمر جوه القلوب واستنى يطلع عليه نهار الحُرية
والإنسانية مَنزِلة ما ينولها غير أصحاب القلوب الوفيَّة
ناس تعرف يعني ايه احساس ولربّها تخلص النِيَّة
دَعوُا ربُهم يِنَزِّل عليهم رحمِته ويبعتلُهُم رمز للشفافيه
وبسرعه استجاب الرب ليهُم وبعتلُهُم بُشرى بالرحمة الإلهية
جنة الله على أرضُه طيابه وحُب .. إخلاص وحنيِّة
مفيش حقد وغِل مفيش كُره .. ولا نفس عَصِيَّة
ورود جميله .. ويا بَختُه اللي يعاملها بنفس سَويَّة
ورود تبُص عليها تلاقي نداها دموع محتاجه حنان
تقرب منها تبص لعينيها تلاقي الامل فيها حيران
وايه ذنب الورود لما تلاقي الدنيا مفيهاش أمان
إيدك في إيدي نِعدِل غُصنها المايل قبل ما يفوت الأوان
قادرين بالعزيمه والحب نمسح دموع الورود على الأغصان
ونحوّل ليل الحُزن والأسى فيها للوحة جميله رسمها فنان
إيدك في إيدي بعد اختمار الامل نقول إعلان ……
باسم الانسانية هِنا وهنِاك وفي كل مكان ….
هانعمل معادلة صمود جوَّانا ننادي بيها على الانسان
ونهِد أسوار اليأس فيهم وللأمل نِبني جُدران .
—-
* من أُوبريت معاني الانسانية (عن ذوي من الاحتياجات الخاصة ويُرمَز لهم بالورود).
