حياتي اليوم صحيفة إلكترونية يومية
لو انت انسان اجتماعى وبتحب الناس ودايما بتساعدهم وبتبذل مجهود كبير انك تسعدهم بس لما بتحتاجلهم فى وقت مش بتلاقيهم وقتها بتلاقى نفسك لوحدك!
بتلجأ لربنا لأنه الوحيد هو اللى شايفك وعالم بحال نفسك:
(تَعْلَمُ مَا فِي نَفْسِي وَلَا أَعْلَمُ مَا فِي نَفْسِكَ ۚ إِنَّكَ أَنتَ عَلَّامُ الْغُيُوبِ ) سورة المائدة ١١٦
الشعور السيء اللى بيوصلك بيدمر أي إيجابية ممكن الانسان يمتلكها لانه طول ما هو مش حاسس بتقدير من اللى حواليه على اللى بيعمله بتخليه يتصرف تصرفات غير شخصيته فمعظم تقديرنا الذاتى لنفسنا واحترامنا لذاتنا بنستمده من الآخرين
فبيزيد رضانا عن نفسنا من رضانا عن اللى بنعمله للآخرين ولو قل تقديرهم بنفقد تقديرنا لنفسنا!
مفيش حد بيقدر يعيش من غير علاقات اجتماعية علشان تقوى ثقتنا بأنفسنا ويرفع من قدرتنا على التسامح والاحترام والتقبل للآخرين كقوله عز وجل
(إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ ۚ وَاتَّقُوا اللَّهَ لَعَلَّكُمْ تُرْحَمُونَ ) سورة الحجرات ١٠
بس لازم نعرف لما نتعامل مع الآخرين اننا بنتعامل مع انفس جواها اهواء وكبرياء وغرور فكل اللى انت مستنيه يتقالك ممكن ماتسمعهوش واوقات بيهاجموك وبينتقدوك!
علشان كده لازم يكون عندك سيطرة على نفسك ومتفهم ومتسامح كقوله عز وجل
(وَاعْلَمُوا أَنَّ اللَّهَ يَعْلَمُ مَا فِي أَنفُسِكُمْ فَاحْذَرُوهُ ۚ وَاعْلَمُوا أَنَّ اللَّهَ غَفُورٌ حَلِيمٌ )سورة البقرة ٢٣٥
احنا بنتعامل مع بعض علشان نحقق المنفعة لبعض والمجتمع ولكن من غير ما ندخل فى حياة بعض !
(( لو ابصر المرء عيوب نفسه لانشغل بها عن عيوب الناس ))
كل واحد مطالب بإصلاح نفسه وتركه عيوب الآخرين
كقوله عز وجل
(كُلُّ نَفْسٍ بِمَا كَسَبَتْ رَهِينَةٌ) سورة المدثر٣٨
فتتبع احوال الناس وعوراتهم وعيوبهم والتحدث عنها والطعن فيهم حتى لو على سبيل الانتقاد كأنك بتغطى عيوبك بعيوبهم
كقول رسول الله صل الله عليه وسلم:
(يبصر احدكم القذى فى عين اخيه وينسى الجذع فى عينه )) صدق رسول الله
الانسان اللى بيضخم من عيوب الآخرين صورته عن نفسه بتكون صغيرة جداً ..فهى كمرآة بتعكس نفسه واحساسه وثقته بنفسه وبتظهر ضعفه ..
انشغالك بغيرك هيجرك للغيبة وسوء الظن وهيدخلك فى مشاكل لا تخصك وانت فى غنى عنها
فقد قال رسول الله صل الله عليه وسلم
“من حسن اسلام المرء تركه ما لايعينه”
صدق رسول الله
(ادعو معايا …وفى دعائى شفائى):
اللهم يا مؤنس كل غريب ويا صاحب كل وحيد ويا ملجأ كل خائف ويا كاشف كل كربة
أسالك ان تقذف رجاءك فى قلبى حتى لا يكون لى هم ولا شغل غيرك …
يارب العالمين انى مسامح كل من احصاه ربى فى كتابه بأنى غفرت لهم وسامحتهم وصفحت عنهم ولا اريد منهم ان يقضوا لى حقوقى فى يوم القيامة عفوت عن الذى اعرفه والذى اجهله واخصلت النية لله.
