حياتي اليوم صحيفة إلكترونية يومية
"مفيش بنت مش في حياتها طنط حشرية"، مقولة شهيرة قالتها الفنانة هند صبري في مسلسل "عايزة اتجوز".
فعلا في حياة كل واحدة فينا شخص عايز يحدد مصيرك في اهم موضوع في حياتك، وهو "الجواز" او ما يسمى "جواز الصالونات".
في ناس من رأيها ان جواز الصالونات ده شئ رائع..على الاقل الطرفين شايفين الموضوع بنظرة جدية يعني مفهاش هزار، وفي ناس تانية شايفة إنه شئ مهين وبالذات للبنات، بتحس ان طنط حشرية دي "ايا كانت هي الجارة او والدة العريس او اي شخصية تانية" هي اللي بتختار للعريس انه يكمل مع مين يعني بتحس انها "بضاعة معروضة للبيع"..
علشان كده بترفض المبدأ ده من أساسه..وفي بنات تانية شايفه إنه طالما لجأ لجواز الصالونات اكيد في عيب رفضته كل البنات اللي عرفها في حياته..وعلشان كده لجأ للجواز بالطريقة دي، باعتبار ان المتقدم ليها لسه متعرفوش ولسه معرفتش طباعة، والعكس صحيح.
لكن نصيحتي بشكل عام سواء للولد او البنت: اقعدوا، اتكلموا، ولو حسيتوا بارتياح كملوا..ومتحطش في اعتبارك انه جواز صالونات او انتريهات طالما تم القبول..
متعرفش نصيبك فين، جايز اللي بترفضه ده هو اللي ربنا كتبهولك، واللي سعادتك هتكون معاه..بس ادي لنفسك فرصة.
