حياتي اليوم صحيفة إلكترونية يومية
على رأى الفنانه هيفا لما قالت " ليك الواوا..شوف الواوا بوس الواوا, وردد وراءها الوطن العربى كله.."بست الواوا..بقت الواوا..صح", واتلهى الجميع فى البحث عن مكان الواوا..وشكل الواوا..وحجم الواوا…و"الميكروكرووم "اللى بيخفف الواوا, ونسيوا مع الواوا كل معاناتهم اليوميه من زحمة المرور, و طوابير أنبوبة البوتاجاز والصراع على رغيف العيش, بل إن البعض فى وطننا العربى قد نسى مع الواوا..أن بلده محتله !! أو أن هناك قواعد أجنبيه تحتل أراضيه !! أه والله كل ده بتأثير الواوا..والواوا وحدها..!!
لذلك لم أر أى غريب فيما يحدث حولنا اليوم فى مصر من أحداث ووقائع تافهه تحولت لحديث الساعه, وأصبحت محط إهتمام الجماهير , فالواوا قد تطورت وتلونت, وأصبح هناك أجيال جديده من الواوا..!
كيلو اللحمه البتلو يصل الى 125 جنيه واللحمه العاديه ب 80 !! والدوله لا ترى ولا تسمع !!وعندما يتكلم وزير التموين يكون كمن صمت دهرا ونطق كفرا!! فيقول : الأسعار مش هى اللى غاليه ..المرتبات هى اللى ضعيفه!! فعلا لا فض فوك يا مولانا..!! طيب بص..كيلو الباميه ب 30 جنيه!!شوف العصفوره..!!! ياسمين النرش ضربت ضابط المطار !!عصفوره تانيه!! طب مش نافعين !! إلحق بقى خد دى …صادروا أموال أبو تريكه..!!! يا نهار مش فايت..!! الباميه اشتغلت مع الناس يومين ورجعوا افتكروا مصيبة اللحمه!! وسيدة المطار عملت زوبعه أسبوع …والناس رجعت برضه افتكرت اللحمه..!! خلاص أبو تريكه وفلوسه يشتغلوا أسبوعين…والناس رجعت تانى للحمه!!
وتانى…وزارة الكهرباء بتغلى اللأسعار والنور بيتقطع !! ومع ذلك .. شوف العصفوره!! إلحق يا جدع..وزير العدل قال ابن الزبال ما ينفعش يبقى وكيل نيابه!!! طيب والكهربا التى اتقطعت عن أسوان كلها فى يوم واحد..لا حس ولا خبر…لا..!!ماهو أصل وزير العدل استقال أو أقيل!! طيب والكهربا اللى بتتقطع دى!! ماهو انت "بوس الواوا".!!
وهكذا يا ساده يا كرام..ننسى همومنا ومشاكلنا الحقيقيه بفعل فاعل أو بإيحاء من الحكومه.!!.فكل ما نحتاجه منها "لهايه" أوشخشيخه فى يد طفل ..تهزها فينسى الطفل بكاءه مع أصوات بلابلها , فيندهش ويحاول اكتشاف خبايا لعبته وينسى أن أمه قد تركته ..وذهبت!!
ونحن شعوب كالأطفال لا نحتاج من أى حكومه تعجز عن حل مشاكلنا او مواجهة تحديات تواجهها إلى أكثر من "شخشيخه "تهزها فيعلو صوت ضجيجها ..فيشتت انتباهنا ويلهينا فنلتهىى ونننسى !! لكن أصحاب نظرية الشخشيخه قد غفلوا أن الشعب لا ينسى أبدا ان حكومته قد تركته فريسة للتجار والمستوردين, وأنها تصر على الإبقاء على بعض الوزراء والمحافظين, ممن كشف تراكم الأزمات عجزهم وقصور فكرهم وضمور قدرتهم على تقديم أى حل!! ولن ينسى الشعب تصريحات وزراءها الذين أبدعوا عندما فسروا الماء بالماء !! عملا بالمثل الساخر..مش الأتوبيسات هى اللى زحمه يا فندم.الناس هى اللى ما بتعرفش تركب أتوبيسات !
أما نحن فليس لنا إلا أن نبوس الواوا..ونشوف العصفوره ونتلهى!! ومره على مره سيفهم الشعب لعبة العصفوره, والشعب "الطفل" هيفهم اللعبه , والحكومه هى اللى هتشوف العصفوره !!
