حياتي اليوم صحيفة إلكترونية يومية
سيادة الريس …. كل سنة وانت طيب ..العيد قرب ياريس واحنا شعب مصر اللي بيحبك، واللي اختارك، واللي نزل ملايين ملايين يطلب منك تكمل جميلك، وفي العيد ياريس اتعودنا علي العيدية، كانت دايما بتبقي فلوس . نفرح بي ها ونشتري كل اللي نفسنا فيه، فستان للبنت، بدلة للولد. جزمة جديدة، أكلة حلوة، كسوة لصالون البيت.. لكن السنة دي ياريس مش عاوزين العيدية فلوس!!
لأن الجنيه بتاعنا اتقلت قيمته، واتبهدل، ومابقاش يجيب حاجة!! ومش هنبقي طماعين ولا نتبري من أصلنا ونطلب منك ياريس تدينا عيدية بالدولار!! لكن عديتنا الحقيقية أنك تشيل من علي قلبنا المسئولين اللي وصلونا للحالة دي!!
واحنا ياريس عارفين ومتأكدين إن ماحدش بيقولك كل الحقيقة!!
وبيفهموك اننا ناس مفترية، ومش عاجبنا العجب، وكل مسئول من دول يطلع يمسك في إيده السبحة، ويخرج كل يوم بتصريحات وردية في الجرايد، ويفهم الناس إنه جاب الديب من ديله، واهو كلام ابن عم حديت، وكلام الجرايد مدهون بزبده يطلع عليه النهار يسيح!!
كيلو اللحمة ياريس قرب يبقي بـ ١٠٠ جنيه!! والفراخ اللي كنا بنتداري فيها بقت الواحدة بـ ٤٠ جنيه!! ووزير التموين المسئول عن كل ده بيخرج يقول ان الأسواق تحت السيطرة !!
طيب ياريس لو ما كانش الوزير مسيطر كان عمل فينا إيه تاني!! وقالوا لنا أن الدولة حاسة بينا وان السكن هيبقي كتير، رحنا نشوف بيت العيلة اللي قالولنا عليه في وزارة الاسكان طلع الوزير وقال ان متر الأرض في الصحرا ب 4000 جنيه !! ومن يومها الدنيا ولعت !! وبقي السكن في مصر أغلي من أمريكا!!
ومش بس كده، ده احنا عندنا وزير مالية قرب يعصرنا ويطلع علي أرواحنا ضرايب، وبيقول إن الأغنيا غلابة ما نقدرش نيجي عليهم، فبييجي علي الموظفين، والمعدمين . قبل ما يفرحوا بالعلاوة بياخد منهم ضريبة عليها، وقبل ما نلحق نتنفس يغلوا علينا الكهربا، ولو فكرنا نعترض، يهددونا برفع أسعار الغاز والبنزين!!
ياريس … مش عاوزين فلوس، لأنها مش هتشتري حاجة !! ولو مش مصدق أطلب من أي وزير يلبس جزمة مصري !! مش هيلاقي !!لأن وزير الصناعة اللي قال انه هيفتح الف مصنع طلع أننا فهمناه غلط!!، لكنة في الحقيقة انه قفل ألف مصنع، وخرب مليون بيت بقراراته اللي مش فاهمين هي لصالح مين!!
الجلود بتاعتنا بتتصدر خام، والمدابغ قفلت، والمصانع سرحت عمالها، والوزير كل يوم يطلع يبتسم ويطلع تصريحات، لأ ومش بس كده، ده بيسافر يعمل اتفاقيات كل يومين..وكله في سبيل الصناعة المصرية!! ولو جربت تشتري ملابس مصرية، مش هتلاقي غير التركي والصيني بس!! لأن مصانع الغزل والنسيج قفلت، وبقينا نستورد قطن من الخواجات، وأسعار الهدوم بقت في السما فبقينا نلبس من البالة..!!
ياريس… مش عاوزين فلوس..خلاص هنعيد في البيت، علشان نوفر بنزين ومش هنلبس حاجة جديدة، لأن الحاجة نار!!، ولا هندي العيال عيدية، وممكن نعيش ونستحمل شوية، بس طالبين منك عيدية، تخلصنا من كل المسئولين اللي مش حاسين بالغلابة. واللي عايشين علي تصريحات وهمية، واللي سودوا الدنيا في عنينا، واللي بيظلموا المصريين، وترد للجنيه المصر اعتباره، واحترامه..وكل سنة وانت طيب.
مواطنة من بر مصر
