حياتي اليوم صحيفة إلكترونية يومية
شاهندا البحراوي
أنا النهاردة حتكلم عن ملف خطير جدا.. وللأسف منتشر في المجتمعات العربية وخصوصا مصر بشكل مخيف جدا.. هي ليه كل حاجة ماشية في بلدنا كوسة حتي ولو لأتفه الأسباب.. تلاقي دايما مع اي موقف يطلع كدا حد يقولك متعرفش انا ابن مين.. عارفين يا سيدي وفاهمين بس ليه بقينا كلنا كدا …
دايما ندوس علي كرامتنا قصاد الناس اللي معاهم فلوس ونفوذ.. ودايما مش بنيجي وناخد حقنا غير من الغلبان.. وللأسف الفكرة دي بقت مسيطرة علينا وعلي عقول أطفالنا.. تلاقي دايما الطفل اللي معاه فلوس كل اصحابه يتعاملوا معاه علي انه ابن ناس.. وتلاقيه دايما يتعامل مع اصحابه اللي اقل منه ماديا علي انهم أقل منه مكانه أو ان حضرته من كوكب تاني غيرهم..
الناس بقت كل همها المظاهر الكدابة وبس.. أنا عايزه أفهم حاجه ليه مصطلح ابن الناس دا إلا محتكرينه أصحاب الفلوس والنفوذ.. مع إننا لو فهمنا المعني كويس حنلاقيه بعيد كل البعد عن اي ماديات.. وانه المفروض يطلق علي اصحاب الشخصيات المحترمة قلبا وقالبا.. بس إحنا دايما اللي تفكيرنا عقيم ومعاق للأسف.. يعني مثلا قصة "سيده المطار " إللي إنتشرت اليومين دول وطبعا كلنا شفنا كمية السفالة وقلة الأدب إللي صدرت من هذه السيدة..
وفي الآخر ألاقي ناس بتقول أصلها بنت ناس بس لسانها طويل شوية.. هي بنت ناس عشان معاها فلوس..طيب لو الموقف دا حصل مع واحدة فقيرة كنا حنقول عليها برده بنت ناس.. ولا كان حيتقال لفظ تاني مع إن الموقف كان حيبقي هو هو.. ولكن الاختلاف الوحيد في الماديات.. وطبعا في ناس كتيرة في مجتمعنا بتضيع حقوقهم بسبب ولاد الناس اللي هما لا ولاد ناس ولا حاجة.. إنتوا عارفين إحنا بالظبط عاملين زي إيه؟
زي الموظف الغلبان إللي عنده إبنه مريض وراح يعالجه في مستشفي إستثماري كبير لأنه للأسف مش لاقي مكان فاضي في المستشفي الحكومي ومستني دوره.. ولما راح المستشفي الإستثماري إللي صاحبها رجل أعمال كبير وبيضارب في البورصة بفلوسه ومعاه ملايين رفض ياخد ابن الراجل الغلبان غير لما يدفع الفلوس الأول.. مع إن المبلغ اللي هو عايز ياخده من الراجل دا هو ممكن يصرفه في سهره من سهراته.
وطبعا الموظف الغلبان اللي مرتبه مش بيكفيه لآخر الشهر هيروح ياخد رشوة من راجل غلبان تاني زيه..عشان خاطر يخلصله ورق محتاجه في شغله.. والمواطن الغلبان التاني دا هو نفسه المدرس إللي طرد التلميذ اللي عنده في الفصل عشان مش بياخد عنده درس.. والتلميذ دا هو ابن أمين الشرطة الغلبان اللي أخد رشوة من صاحب العربية المرسيدس عشان خاطر ميعملهوش مخالفة وصاحب العربيه المرسيدس دا بقي هو نفسه صاحب المستشفي إللي رفض يعالج إبن الموظف الغلبان غير لما يدفع فلوس المستشفي الأول..
إحنا بقي بالضبط عاملين كدا.. "كله بياكل في بعضه".. وفي الآخر كل واحد يقولك عايزين نقضي علي الرشوة والمحسوبية.. طيب إزاي.. وإحنا كل واحد فينا بيمد إيده في جيب التاني غصب عنه.. وكل مبرره انه عايز يعيش.. وياريتنا بعد دا كله عارفين نعيش.. ياريت كل واحد يبتدي بنفسه وبولاده.. ويعلمهم بقي القيم والأخلاق إللي إختفت من مجتمعنا نهائيا.. وظهرت بدالها قيم أخري بعيده كل البعد عن الدين..
تعالوا نرجع نفكر صح ونبتدي صح عشان نعرف نعيش صح!
