حياتي اليوم صحيفة إلكترونية يومية
انا عارفة وانتوا عارفين انها فيها حاجة حلوة !
هى حلوة فعلا بس بقت وحشه عشان احنا فيها ..تقولى ليه ..اقولك اسأل نفسك من اول ماتفتح عينيك لحد ما تتخمد وهى ماشاء الله مليانه سلبيات.. احم احم برغم كل الايجابيات اللى فيها .. ايجابيات .. قبل ما نجيب ورقة وقلم ونحسب ونقول هو مين فينا اللى وصلها لكدة؟ هنسرد لكم أهم الايجابيات !
احكيلى كده وانت بتستقبل فاتورة الكهرباء بصدر رحب ومحصل الكهرباء بيخبط على الباب وتفتح الباب وانت مبتسم وهى طبعا ابتسامه صفراء ..وبتجز على سنانك (خير استرها معانا يارب) وتلاقيه فرحان وهو بيديك الفاتورة وتشوف وبعدها مش هتشوف تانى لانك فقدت حاسه البصر يعنى مش فارقة لو مدفعتش ماهى كده كده الشقة هتبقى ضلمه فى عينيك ..وايدك هتبقى بتترعش وانت بتشوف الزيادة الجديدة اللى عاملاها الحكومة ..بصراحة يعنى بيني وبينك دا كله لمصلحتك الحكومة عايزة توفرلك عيشة كريمة علشانك وعلشان ولادك .
البلد مليانه ايجابيات ..اه ايجابيات وتانى حاجه بئا هى زيادة برضه غير زيادة الكهرباء وارتفاع الضغط والسكر عند الشعب هى زيادة فى اسعار السلع الغذائية مش كده وبس لا وزيادة فى اسعار الادوية ..ربنا يباركلك يا حكومة مش حرمانا من حاجه مش لازم تاكل يا اخى اعمل دايت ايه يعنى احنا هنا بنعانى من السمنة المفرطة انت مش شايف كرشك بقي عامل ازاى ؟
كل دا لصحتك وصحة أولادك بدل ما تاكل تلات واجبات كل وجبة واحدة او متاكلش خالص اهو وفرت برضة هقول ايه منتوا اتعودتوا على الدلع .ايه عايزين قمح فى صفقة لسه عاملاها الحكومة عشان تاكل ياسيدي .. ايه دا سامعه حد هناك بيقول دى صفقة فاسدة آه والله فاسدة. هو يعنى بلدك اللى بتوفرلك كل الامتيازات دى هتيجى عند دى وتعمل حاجة لخدمتك ماشاء ولاحول ولا قوة الا بالله القمح طلع مسرطن. ليه كده ياجماعه لا عيب بجد.
لسه الحكاية مخلصتش لسه..لسه فى ايجابيات كتير بس انت اللى عندك حول مش واخد بالك… هو فيه ايه ! لا بجد هو فيه ايه .. هى دى حاجه ايجابية ولاسلبيه ..انتشار ظاهرة خطف البنات والأطفال واستغلالهم في تجارة الاعضاء لو البلد دخلت فى نوع من التجارة دى هيحصل انتعاش ممكن يدخلنا فلوس اكتر منها حلوة برضة"مصلحة" . انا مش فاهمه ايه كل القصص والحكايات اللى بنسمعها عن حوادث الخطف دى فعلا كارثة.
هو الشعب زعلان ليه، الحكومة بتساعدك بحلول اولها احنا عندنا زيادة فى نسبة العنوسة وبكدة عدد البنات هيقل وتانى ميزة تجارة الاعضاء ودا انتعاش لبلدك جنب قناة السويس الجديدة. "بلاد الضرائب" انت فاكر دخول الحمام زى خروجه..لو كنت عرفت تخلع من هنا لا ياحبيبى وراك وراك لو روحت المريخ .. انت فاكر لما تسافر بره مصر انها هتسيبك لاهى متمسكة بيك حتى لما تقضى عليك لا قصدى تشلك بس برضة هتخليك تعيش حتى لو مش بتسمع ولا بتشوف ولا بتمشى.
أعضاء برلماننا الموقر ..شكرا لا شكرا بجد مش عارفين نودى جمايلكم فين "قانون فرض الضرائب على العاملين بالخارج " هم يضحك وهم يبكى ..بس طول الوقت يخلينا نبكى على اللى وصلنا ليه ..احنا شعب مرفه ومش عارفين نودى فلوسنا فين عشان كده سافرنا نتبهدل وندفع ضرائب لحكومتنا الموقرة. عموما هى بلدنا احنا …بمعنى احنا اللى نخاف عليها مش اللى يرضوا بالظلم والفساد والقهر والتعذيب وكل انواع الاضطهاد والاعتداءات اللا انسانية.
هى مالها قلبت بنكد كد ليه؟ بلاش الكلام بتاع الظلم والاضطهاد ، لا لسه فى أمل. أمل فينا احنا ولو عايزين البلد دى تكمل وعايزين نعيش بكرامه وحرية وعدالة اجتماعية يبقى لازم نحقق الاهداف اللى بتسعى لتحقيقها حكومتنا الموقرة..!
