حياتي اليوم
احتل الانترنت والفضائيات مكانة كبيرة فى حيز الحياة اليومية لأى شخص الآن وخاصة مواقع التواصل الاجتماعى وبرامج التوك شوك ، واصبح يعول عليها فى أداء الواجبات الاجتماعية ومهام العمل ، احدث نوعا من التطور فى اسلوب الحياة ، ولكن لنتخيل ان الحياة فجأة اصبحت بدون انترنت او فضائيات فما هو شكلها ؟
1 – هاتقدر تنام بدرى لانك مش مضطر تسهر على الشات وامام التلفزيون لحد الفجر أو الصبح وممكن ماتروحش شغلك ، لأن النوم المبكر والاستيقاظ المبكر هايساعدك تضبط وقتك جدا .
2 – هاتقدر تقعد مع اسرتك وتتواصل معاهم وتتكلم معاهم زى زمان أكتر لانك هاتبقي مش منعزل عنهم فى ركن لوحدك فى أوضة منعزلة جوه البيت مع عالمك الافتراضي .
3 – أعصابك غالبا مش هاتبقي مشدودة لأنك مش هاتتوتر لقراءتك او سماعك خبر محزن أو حاجة تنكد عليك ومش هاتفيدك لو عرفتها .
4 – هاتكتفى بنشرة الأخبار وبرامج التحليلات الاسبوعية ومش هاتضطر تسمع برامج التوك شو والناس اللى عمالة تزعق وتتخانق على الفاضية والمليانة .
5 – هاتقدر تصحى بدرى نشيط جدا ونفسك مفتوحة للشغل ، لانك بعدت عن التوتر .
6 – بدل ما تكتفى بزيارة صاحبك المريض فى المستشفى بكومنت على الفيس بوك ، هاتروح له وتزوره أحسن .
7 – بدل ما تعزى صاحبك على الانترنت لو والده توفى هاتروح تعزيه وجها لوجه وده هايدعم صداقتكم اكتر .
8 – نفس الشئ لو هاتشاركه فرحه مش هاتكتفى بالف مبروك انترنتية ، هاتروح له وتشاركه فرحته .
9 – فرص خيانتك لزوجتك هاتبقي قليلة لانك مش هاتقابل فلانة وعلانة على الشات وتبقى عايز ترغى وتفتح موضوعات ، ومش هاتبقي مضطر تضبط الدش على قناة “من اياهم ” وترتكب معصية .
10 – مش هاتبقي مضطر تستحمل زعل صاحبك اللى بيستظرف على الفيس بوك وهو بيحط الش رخيص ومطلوب منك تعلق وتعمل لايك .
11 – هاتفكر ترجع تقرأ تانى علشان تشغل وقت فراغك وده افضل مئة مرة وهاينمى ثقافتك لانه هايخلق حالة من الالفة بينك وبين الكتاب .
12 – مش هاتبقي قلقان على ابنك اللى ممكن يكون مفهمك انه بيذاكر وهو فاتح الموبايل خلسة .
13 – هاتروح تخلص معاملاتك البنكية بنفسك بدل ما تحط أرقام الفيزا بتاعتك على النت وتبقي معرض إنها تتسرق وبالتالى تتسرق فلوسك .
14 – علاقتك بمديرك فى الشغل هاتتحسن لان التواصل بينكم هايبقي أحسن من انه يبعت لك ايميل وماتردش عليه أو العكس .
15 – وكمان علاقتك بزوجتك واولادك هاتبقي أحسن واحسن لانك هاتسمع لها وتشوف مشاكلها ومشاكل ولادك وتحلها .
16 ـ هاتخفض مصاريفك الشهرية من فواتير الكهربا وفواتير الانترنت .
17 – اسرارك هاتفضل بتاعتك ، محدش هايطلع عليها لان ممكن حد يسرق الباص وررد بتاعك ويفتح ايميلك او الشات بتاعك ويشوف كلامك وصورك الخاصة مع اهلك .
18 – صحتك هاتتحسن لانك هاتريح عينك من جميع انواع الشاشات موبايل وتلفزيون .