شاهندا البحراوي تكتب: عكس الصورة..!

عدد المشاهدات = 1543

أنا النهارده قررت اتكلم عن عكس الصورة واللى اقصد بيها هنا نظرتنا وتفسيرنا لكل شئ حولينا..

كلنا الفترة دى أول ما بنفتح التليفزيون أو الفيس بوك بنشوف وبنسمع عن حوادث غريبة حصلت وآخرهم حادثة الطائرة المنكوبة 

والاغلبية منا اصابه الإكتئاب وفقدان الأمل وبقينا دايما نشوف إن كل حاجة في بلدنا وحشة وبقت البلد مليانه فقر وبطالة ورشوة وفساد ومبقاش عندنا اى أمل للإصلاح حتى الأمل اللى كان مالينا حماس بعد ثوره 25 يناير اصبح الأغلبية مننا بيتمنى إنه يهاجر لانه مش شايف اى أمل إن البلد تتغير أنا من وجهه نظرى كمواطنة عادية ليها احلام وطموحات في حاجات كتيرة نفسى تتغير بس قررت إنى اعكس الصورة 

مينفعش اشوف الصورة طول الوقت ضلمة محتاجين نشوف فيها بصيص من النور زمان كنت قريت كتاب عن الفيلسوف الإنجليزى برناد مندفيل وكان بيحكى فيه عن "قصة خلية النحل " وكان بيتكلم فيه عن خلية شغالة وبتتكاثر طول الوقت بشكل مبهر بس للأسف الخلية دى كانت مليئه بالفساد والخراب وقلة الضمير، وكان نحل كتير بيشتكى من عيوب الخلية وكان بيحاول دايما يحاربهم..

 وفجأة قررت الخلية انها تتخلى عن العيوب دى، ومع مرور الأيام اكتشفوا ِإن النحل اللى كان شغال قضاه ومحامين مبقاش عندهم شغل وماتوا وبعد فتره قصيره اكتشفوا إن جزء آخر من النحل بدء في مرحلة الإنتهاء لتخلى بعض النحل عن صفة حب المظاهر، فالنحل اللى كان اعتماده الاساسى على بناء البيوت والمظاهر تضرر من الفعل دا ومع مرور الوقت اكتشفوا إن الخلية ماتت بالتدريج..

 أنا مش بحلل الفساد ولا بدى مبرر لوجوده بس اللى عايزه اقوله إن طالما الشر موجود يبقى اكيد الخير موجود.. كلنا بنسمع وبنشوف كام موظف مرتشى في الدولة وكم عمليات الفساد والرشوة اللى موجودين.. بس محاولناش في وسط الزحمة دى نشوف وندور على الناس الشرفاء.. كلنا بنشوف في اى موقف بتروحه كام سواق منحرف بس محاولناش نشوف الإتنين التلاتة الكويسين..

 وللأسف طبيعه المجتمع دايما بتبرز الشر.. ودا شئ فطرى في الطبيعة البشرية دايما بتخلينا نشوف الوحش قبل الحلو.. وببساطه اكتر لو كلنا شر كان ربنا خسف بينا الأرض زي اقوام كتيره اتعملوا عبره لينا.. لكن مادام الخلية لسه شغالة وعايشين يبقى اكيد لسه فينا خير..

 ياريت كلنا نعكس الصورة ودايما نحاول نشوف نص الكوباية المليان.. وندور على الخير وسط الشر.. بلاش نشوف بلدنا وحشة طول الوقت.. وخلينا متفقين على قاعدة كلنا لازم نفهم معناها كويس "لعل الخير يكمن في الشر "!