حياتي اليوم صحيفة إلكترونية يومية
أنا حتكلم النهارده عن مشكلة للأسف موجوده في أغلبية البيوت المصرية وهي العقد النفسية الموجودة في أغلبيه اللي حولينا وموجوده جونا إحنا من غير ما نبقي واخدين بالنا منها..وللأسف بتتورث من جيل إلي جيل لأنها عيوب مكتسبه وليس فطريه أنا ببقي مستغربه أوي لما أشوف ناس متزوجه من فتره كبيره والعلاقة بينهم تكون عامله زي علاقه الكمساري بسواق الأتوبيس ياعني مثلا ألاقي الراجل طول اليوم برا البيت وبيتعامل مع دا بلطف وبيضحك في وش دا وصبور أوي علي دا لحد ما يجمع مرتبه أخر الشهر ويجري يديه لمراته عشان تشوف مصاريف البيت.
وطبعا بيكون هو كدا عمل الا عليه إتجاه مسئوليته قدام مراته وولاده لأنه مخلاش البيت ناقصة حاجة وبكدا يكون بقي خلصت مهمته وبينتظر بقي المقابل من ست البيت إلا طول اليوم مش لاقيه وقت حتي لنفسها عشان تشوف ناقصها إيه لأن دايما الست المصريه بتنسي نفسها وسط الزحمة لأن طبيعه المجتمع المصري والظروف الإقتصاديه هي الا بتفرض عليها دا لكن إحنا معندناش للأسف ثقافه تنظيم الوقت وطبعا الرومانسية عندنا إنها تديله أكبر حته في الفرخة!
ولما يتجمعوا مع بعض عشان يتكلموا مش بيتجمعوا غير في المشاكل لا قدر الله أو لما بتكون في عزومة كبيرة في البيت ولازم الكل يكونوا موجودين ومتظاهرين بالسعادة الوهمية والضحكة في وشهم تكون عامله زي ضحكه إعلان لافشكيري ولو جات فرصه إن حد فيهم يعد مع التاني لوحدهم بيكونوا ساكتين ومش لاقين كلام يقلوه وبيكتشفوا مع الوقت إنهم وسط الزحمة دي كلها نسوا بعض ونسوا حتي نفسهم حتي نسوا ولادهم ومفكروش غير في متطلبات الحياه وبس وبنكتشف إن تقيمنا للامور الحياه الزوجية تقييم مادي!
وساعاتها بيبقي اول سؤال محتاج إجابه هو إحنا ليه مانتغيرش؟! ونحاول نشوف بعض نحس ببعض نفسنا في إيه نقصنا إيه بنحب إيه دا إحنا وسط الزحمة دي كلها ببنسي بعض وبنكتشف بعض بالصدفة كأننا اول مره نعرف بعض ليه منحولش ندور علي الحلقة المفقوده في الحوار بينا ونوصلها عشان نعرف نتواصل وعشان نعرف كمان نربي ولادنا صح من غير عقد نفسيه لأننا مش بنضيع نفسنا وأحلي سنين عمرنا وبس.
إحنا كمان بنضيع اقرب الناس لينا وهما "ولادنا " لانهم دايما بيبقوا محتاجين يعيشوا في بيت كله إحتواء ودفء لأن نقص الأشياء دي بيخلي بتنا يبتدوا يدورا علي دا برا البيت مع أول حد يقابلهم حتي لو أضطرت إنها تخلقه في خيالها هي وبس ودا طبعا بيخلي بنتنا تنخدع بصغار النفوس الضعيفه وبالنسبة للولد بيدور علي أقرب حد يقابله عشان يطلع عليه عقده النفسيه بكل وضوح.
وفي الأخر نلاقي نفس المأساة بتكرر من جيل إلي جيل والسبب الرئيسي فيها هو "الخلل الموجود في بيوتنا وفهمهم للحياه غلط علي إن الأساس فيها هو الماديات وليس الروحانيات" ..والسبب التاني هو إننا دايما بندور في الجواز علي الشخص المناسب وبننسي دايما إن الأهم في الجواز مش إنك تلاقي الشخص المناسب الأهم إنك تكون إنت الشخص المناسب عشان كدا نفسي كلنا نتغير للأحسن ونغير بقي معتقداتنا وأفكارنا الغلط ونربي ولادنا صح عشان نخرج جيل صح من غير عقد نفسية!
