حياتي اليوم صحيفة إلكترونية يومية
كلنا بقينا بنسمع الكلمة دى كتير، والأغلبية مننا بقى بيوصف بيها بعض، لكن محدش فينا فكر يدور جوا نفسه، هل هو كمان عنده شيزوفرنيا ولا لا، كلنا عندنا شيزوفرنيا لكن بنسب متفاوتة، بقينا مصابين بيها فى اختياراتنا وحياتنا..
تلاقى البنت بتحلم بفارس الاحلام اللى يخطفها على حصانه الأبيض اللى طول الوقت مغرقها شيكولاتة وورد، لكن وقت الجد بتبدأ تطمع فى اللى يدفع اكتر، كأن الحياة مزاد مش مشاركة، بنفكر فى القاعة اللى بخمسين ألف، وبننسى إن فى جميع الحالات محدش هيسيبك فى حالك، كله هيتريق أصلك متقدريش تعجبى كل الأذواق!
كلنا فكرنا فى الشبكة السوليتير واللازوردى، بس محدش فكر إنك لما تتخانقى الأسورة الذهب مش هتصلحكم على بعض، ولا الدبلة السولتير هتطيب خاطرك، الأغلبية بيفكروا فى العفش اللى من أجود الأخشاب، ونسينا انه فى الآخر دا سرير ودا سرير، وإن عمرك ما هتعرفي تنامى وترتاحى فيه غير وانتى مرتاحة البال، ومطمنة على نفسك مع راجل بجد، فكرنا فى المنظرة الكدابة والشقة الألف متر و16 بلكونة عشان الناس كلها تشوفك محظوظة، وكأنك أخدتى الأمير اللى كل البنات بتحلم بيه، بس نسينا فى دا كله إن الناس فى الآخر هتروح بيوتها، وانتوا اللى هتفضلوا مع بعض، الحب والتفاهم هو اللى هيخليكم تكملوا وتعدوا كل المشاكل سوا مش العفش ولا الدهب!
كلنا بنحلم بالمظاهر الخداعة، بس محدش فكر فى الحقيقة الأغلبية مننا بقى بيحكم على الناس من خلال وظيفته، ودايما صاحب الوظيفة المرموقة هو اللى بيجلب الإحترام ، وصاحب الوظيفة البسيطة شايفينه شئ عادى بيتكرر كتير، لدرجة اننا علمنا ولادنا يبقوا شبهنا، ومفكرناش ولا مرة نعلمهم إن مش مهم الوظيفة تبقى بسيطة ولا كبيرة لكن الأهم إنك تكون مميز فى وظيفتك، موظف نشيط ومميز افضل بكتير من دكتور فاشل ولا وزير ليه غلطات كتيرة!
ثقافة البساطة أفضل بكتير من حياه التعقيد والتأهب اللى بقت مالية حياتنا..خلينا ولو لمرة واحدة نفكر ونتخلص من التعقيد اللى بقى مالينا، وتعالوا نعيش حياتنا ..الحياه أبسط من إننا نعيشها بشيزوفرنيا..!
