واحدة ست معرفة، جوزها مطلع عينها وكرهها في عيشتها. بقالها أسبوعين يا عيني بتقف يوميا علي أبواب المدارس الحكومية، ومقضياها محاولات من مدرسة لمدرسة… ومن محافظة للتانية كل أمنيتها أنها تاخد باكو ولا باكوين بسكويت من تلاميذ المدارس !! آه والله.
اشمعني بسكويت المدارس ؟..وليه ما تشتريش بسكويت من أي حتة .. وليه الوقفة وليه البهدلة والجري ورا العيال !! أخيرا عرفت بتعمل كدة ليه نفسها تاخد باكو ولا باكوين بسكويت من تلاميذ المدارس وتأكله لجوزها وتخلص منه بعد ما يئست من المحاولات !!
مرة تأكله من لحوم البرازيل الفاسدة اللي الحكومة ما رضيتش تمنعها عننا..لكن ولا أثرت مع جوزها !! ومرة تنقل له العدوي بالمرض الغامض اللي ظهر في شبرا والحكومة مش عارفاه ولا عاوزة تعرفه برضه أبدا…ولا نفع معاه !!
فقررت تركز علي بسكويت المدارس، وقالت مفعولة أكيد ومابيخيبش وشرعي والحكومة بتوزعه رسمي لكن حتي البسكويت طلع فيه مشكلة..العيال التلاميذ بيكونوا أكلوه كله قبل ما يطلعوا من المدرسة. وحتي لو التلميذ طلع بالبسكوت بتاعه بيصمم ياكله !!
تقوله : يابني ده مسموم .. يرد يقول.. ولو وياكله ويتسمم!! من جهتي..حاولت بصراحة أجيب لها واسطة من التربية والتعليم علشان أعرف التسمم الجاي هيبقي في أنهي محافظه لكن ماعرفتش !!
علي ما التسمم يظهر في بحري وتسافر..هوب نلاقيه في قبلي .. ومن السويس لسوهاج لأسيوط !!
والغلبانة نفسها في باكو بسكويت تخلص بيه من اللي مغلبها في عيشتها . ومطفحها المر .. وبخلان عليها رغم حساباته البنكية اللي بالملايين !!
والحقيقة إن اللي صعب مهمتي وخلاني عاجزة عن مساعدتها.. إن جوزها طلع موظف حكومي في التربية والتعليم وبيشتغل متعهد توريد أغذية لتلاميذ المدارس من الباطن !!
————-
daliagamal2020@yahoo.com