حياتي اليوم صحيفة إلكترونية يومية
ازاى شمس الحب تغيب؟َ! …. رمز الوحدة هلال وصليب
احنا الشعب الأزلى الأوحد……. عنده شعارالحب نصيب
مركب ماشيه لبر أمــــــان…. موسى محمد عيسى حبيب
شوف الحب بألوان ثابتــه…… لو فنان أو كنت أديـــب
ياما حاسد حاول يفـــــتن……. باب الحب ما فيه تسريب
عايز ينخر جوا نسيجــنا…….. زى السوس بسم دبيــب
اسأل كل تاريخ هيقولـــك… مصر حاميها المولى رقيب
أحمد لو ينده هيــــلاقى….. جرجس جاله بسرعه مجيب
واحد يصرخ آه م الشوكه….. يلقى الحضن الدافى قريب..
لمَّـا الروح تتنفس حب…… يبقى إزاى يفتنها غريب؟!
مهما يحاول يأذى بلدنا….. شاف وحدتنا شعره يشيب
شاف الجامع جنبه كنيسة….. طوبة بطوبة بشكل عجيب
أََقسَم إنى دا شعب موحد …….مش راح ينفع فيه تجريب
ربك كاشف كيد الخاين……. مهما حاول غدره يخيب
ثورة سعد أكتوبر يشهـــد…… لو كان عندك شك مريب
لما الناس تبعد تتفرق….. ..إيد الشر أكيد هتصيب
زى فريسه ف وش الديب رايح تبقى ضعيف متعرى..
خلى قلوبنا على بعضينا ……..نعزف لحن الحب طريب
لون الدم ترابنا ونيلنا…. لو فيه جرحْ- الحب طبيب
رمز الوحده هلال و صليب…. ازاى شمس الحب تغيب؟!
