مانيش عبده
ولا هقبل معاك الذل
أنا حوا ومن ضلعك
لكن مش قابله
أكون لك ضل
ولا دبوس لكرافته
بيضويلك قصاد الكل
مانيش عبده ..
أنا حوا
وبيك صدقنى انا كافره
مسافره خلاص من الجنّه
اللى فيها عذاب
مانيش عايزه غرام كدّاب
عشان شفت
الخداع فـ عينيك
فمش هااقبل
تكون لي امام
ومن إيدك أنا اتوضى
عشان صليت بكاس
وجعى
ولا حستنى بمودّة
مودّة إيه ؟
مانيش حاسّه
ومش راجعه
ولا ها ابقى معاك فى الحب
مرتده ..
دى حدّه .. ايوه دى حدّه
ده انا حوا
مانيش عبده
انا بارفان
مانيش بارافان لـ نزاواتك
انا شمعه
وليه تصهرنى قدّامك
فادوب واخلص
ومنى فـ لحظه تتخلّص
مانيش بدعه
فليه تخفينى من ذاتك
وانا حوا
وانا فـ حضنك
بلاقى الخطوه سابقانى
وافكر فيك وتنسانى
بخاف أهمس لتمنعنى
فاحس بوحده من تانى
وانا ف حضنك
بشوف الضحكه كدابه
ما بضحكهاش
وانا ف حضنك
بخاف من فرحه لو جاتلى
ما بفرحهاش
وانا حوا مانيش عبده
انا البركان
ومين يقوى على حممى
وع الازمان
مفيش آدم بـ يغلبنى
ده انا حوا
ومهما ضعفت
اكون اقوى
ومن ذنبك راح استغفر
ولو عينك لدينى فرض
انا العاصيه وبستكبر
ومش هاارضى
اكون لك فرع
وانا جذرى فـ بطن الارض
غرورك ليه. عميك عنى ؟
وانا غيرك مشفتش حد
فبالقوه هاتسمعنى
انا حوا . ومش هضعف
ولـغرورك
هانوضع حد …