الجمعة , 29 مارس 2024

داليا جمال تكتب: عفريت توفيق عكاشة !!

= 1819

—-

‎أسرع طريقة للأذية الأيام دي.. علشان تخلص من واحد متغاظ منه إنك تقول عليه ده اخوان أو ارهابي.

‎أما بقي لو انت وزير إسكان وعاوز تستولي علي أرض أي مواطن وانت عارف إنها أرضه.. يبقي مافيش غير إنك تقول عليها إنها أرض (توفيق عكاشة)!!

ليه تقول ارض توفيق عكاشه؟ لأن توفيق مغضوب عليه من مصر كلها تقريبا.. ولان توفيق عكاشة جنب شغله الإعلامي كان بيشتغل رئيس مجلس إدارة جمعية للإعلاميين، وكان بياخد أراضي من الدولة رسمي زي باقي الجمعيات ويقسمها أو يبني عليها فيلات للأعضاء.. ‎واللي حصل أنه من ٢٠ سنة خصصوا له 4000 فدان علي اطراف مدينة ٦ اكتوبر بموافقة الدولة وباعهم كلهم لنحو 1000 شخص وخرج هو من الموضوع خالص..

قوم وزير الإسكان علشان ياخد الأرض اللي ملك لناس تانية من 20 سنة بلوشي يعمل إيه؟؟

يخلي الإعلامي البارز عمرو أديب يصرخ بأعلي صوت في برنامجة قائلا: إلحقو… توفيق عكاشة عنده 4000 فدان في اكتوبر! مع إن عكاشة لايملك فيها متر واحد!! وهو لا يدري أنه بفرقعة كلمتين في الهوا بكلامه ده يتسبب في خراب بيوت 1000 إنسان!

‎ومش كده وبس (توفيق عكاشة) بنى كومباوند سكني في أكتوبر إسمه (قرية الإعلاميين) وباع الفيلات كلها لناس، وأخذ فيها فيلا واحدة يتيمة باسمه قوم تيجي وزارة الإسكان وتاخد الكومباوند كله لحسابها..وتحط إيدها علي ممتلكات الناس وتسيبهم يضربوا أخماس في أسداس.. لاعارفين حقهم فين ولا عند مين !!

‎ووزير الإسكان (مدبولي) أصبح الآن يملك عصا سحرية .. وعفريت سريع التحضير جاهز تحت الطلب إسمه ( توفيق عكاشة) ! مستغلا سطوة الدولة وانصياع الناس لأحكامها.. ولكنه تمادي للقدر الذي طال حقوق الغير بالباطل …ونظرا لأن عفريت توفيق عكاشة.. لعبة واتكشفت…فياريت معالي الوزير يبدأ البحث عن عفريت جديد يستخدمه كذريعة لتجريد الناس من أملاكها حفاظا علي هيبته وهيبة الدولة أو أن يعيد الحق لأصحابه .. لأن المناصب مش دايمة لحد.

شاهد أيضاً

داليا جمال تكتب: سندوتش المدرسة.. صدقة وزكاة

عدد المشاهدات = 6925 لا ينكر إلا جاحد ان الشعب المصرى شعب أصيل، شعب جدع …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.