حياتي اليوم صحيفة إلكترونية يومية
من عاداتنا المصرية الأصيلة..إن الست الوالدة ربنا يديها الصحة وهي بتعمل الاكل لأولادها وجوزها بتقولهم أنا هاطبخ لكم كذا النهارده.. وده ليه بقي ؟ علشان يتهيأوا نفسيا.
دي تصرفات الأم بقي علشان بتحب ولادها إنما مش تصرفات الحكومة…علشان الظاهر زعلانة من ولادها !
يعني مثلا والدولة بتبني العاصمة الإدارية الجديدة إنجازها الرائع.. الناس بتسأل : هو صحيح في سور عالي حول العاصمة زي ما اتقال هيعزل أهل العاصمة عن باقي البشر؟ وإيه لازمته؟ وسواء كان السور حقيقة أو وهما.. فقد بدأ يعمل حاجز نفسي بين الشعب وبين العاصمة الجديده.. وبالتالي بدأ البعض بالنظر لهذا المشروع بكراهية.. وتمني فشله.. ودي دوافع نفسية طبيعية لأن الإنسان يكرة الحواجز والقيود.
لكن إن الحكومة أو القائمين علي المشروع يطلعوا يقولوا للناس فيه سور ولا مافيش.. ولو فيه يقولوا السبب.. ( طبعا لأ ) لم يكترث أحد بتوضيح الأمر للناس وفضلوا يسيبونا للأوهام وللتخمينات والشائعات تلعب بعقولنا !!
برضه الناس كلها بتقول إن الدولة هتستغني عن ملايين من موظفي الحكومة !! والناس اتفزعت وضربوا أخماس في أسداس.. طيب وأكل عيشنا ومستقبل ولادنا هنأكلهم منين ! وخصوصا وان معظم موظفي الحكومه.. ما يعرفوش غير إنهم يروحوا الشغل وييجوا من الشغل.. وكبر الوهم في راسهم.. وبقي فيه بعبع منغص عيشتهم مش عارفين ده وهم ولا حقيقة.. وبرضه كالعادة .. الحكومة مش بتقطع الشك باليقين ان كانت دي اشاعات ولا حقيقة !!
وكبرت دماغها برضه وسايبة الناس تلف وتدور حوالين نفسهم !!
ترك الناس نهبا للحيرة والقلق علي حياتهم ومستقبلهم في كثير من الاحيان أصبح عند الحكومة أسلوب حياة ونهج إدارة !! اشاعات ومخاوف.. ولا مجيب !!
حتي فقدت تصريحات وزراء الحكومة ومسئوليها كل ثقة ومصداقية عند المواطن المصري..وأصبح المواطن يدرك أن حقيقة الأمور في أي شيئ هي عكس تصريحات المسئولين تماما..ولذلك تيقن المواطن المصري أن البنزين هيغلي بمجرد تصريحات الوزير المختص بأن البنزين مش هيغلي.. لكن الناس قالت.. ما دام الحكومة قالت البنزين مش هيغلي.. يبقي هيغلي.. زي كل مرة !!
فنصيحة للمسئولين والحكومة التي يطيب لها أن تلقي بكل أخطائها وكوارثها علي الإعلام وتتهمه بالتضليل وإثارة البلبلة…ياريت اللي بيته من “إزاز” ما يحدفش الإعلام بالطوب..واحترموا المواطن وقولوا الحقيقه..قبل أن يعرفها لوحده ويبقي شكلكم وحش!
—————-
daliagamal7070@gmail.com
