حياتي اليوم صحيفة إلكترونية يومية
—–
تعرف ايه هو اجمل غرام
هو الغرام …..
اللي يعيش معاك وجواك على الدوام
ويرسم طموح خُطاك بريشة فنان
يخاف عليك وينصحك من صُحبة اللِّئام
ويعلمك الصلاه وفي حُب الله يزيدك هيام
وعُمرُه ما يرضى برجوعك وعايزك تملّي أُدّام
غرام يزرع جُوّاك الأمل من غير حُدود
ويقولك بكره جاي وهتعدي السدود
وبإيمانه بيك قادر يخليك تُملُك الوجود
غرام يسهر على راحتك ما ينام طول الليل
وبإيديه الطيِّبه يشيل عنك الويل
يِنده للصمود جُوَّاك ويدلَّك على السبيل
ويقولك اوعاك ييجي يوم تبقى فيه ذليل
غرام تسمع لصوت بُكاك جُواه صدى أنَّات
ويحذَّرك إوعاك في يوم تِندم على اللي فات
دا انا أفديك بعُمري اللي جاي ولحد الممات
غرام يطبطب عليك بحِنيَّه ويقولك ربَي يخليك
وفي عِز البرد تِلقاه جاي وبرمُوشُه يغطيك
وفي النهار تفتح عينيك على صُوتُه بحنية يِصَحِيك
يفتَحلك شبابيك الأمل ويزرع بذُور العزيمة فِيك
عرفت مين أجمل غرام؟
هي أُمَك وأُمي ست الكُل ورسول السلام.
