—
– 1 –
البنت الجميلة سألت الست اللي بتشوف الودع
ردت عليها قالت لها في سكتك خسيس وجدع
افتحي قلبك وعينك وشوفي مين بيحبك بجد ؟
هتلاقي فرح في حياتك وتعيشي تسوِّي البِدَع
-2-
البنت سمعت كلام الست اللي بتشوف الودع
قعدت محتارة وباتت تفكر في كلام الجدع
بس كانت سنين كتيرة بتحب الخسيس بجد
قلبها مش بإيدها، مش قادر يحب الجدع
– 3 –
البنت مصدقتش كلام الست اللي بتشوف الودع
راحت تقابل الخسيس اللي بتحبه وفاتت الجدع
قالت له بحبك، خليني جنبك، هقف معاك بجد
قال لها: شوفي حالك، ظروفي كده. جاب لها الوجع
-4-
البنت راجعِت كلام الست اللي بتشوف الودع
قالت: خلاص هشوف حالي. وراحت للحليوة الجدع
خلاها ملكة في ثانية ونسيِت الخسيس بجد
والخسيس ندِم عليها بعد ما فاتها للجدع