الاسم باب شقة
و هو باب أفراح
هو بسيط حقة
لكنه خلفه براح
تديه يدوب زقة
تدخل و تنسى جراح
خبط عليه بيدك
مش محتاجين أجراس
ده عمره يوم ما اتسك
لا بقفل ولا ترباس
ومنين هيجي الشك؟
وكل الجيران حراس
شراعته ما تتقفل
مفتوحة ع السلم
وناس اهي واقفة
تضحك وتتكلم
طالع ونازل مين
لابد ما يسلم
وتشم ريحة الخير
بامية و ملوخية
دي الست ام سهير
عليها تقلية
تطبخ و تدي الغير
أم الكرم هي
والريحة دي قهوة
فوق السبرتاية
والطعم له زهوة
تحويجة أيه حكاية
من صنع ايد الحج
والحج دة آية
والله زمان طيبة
ولى وسابنا وفات
أيامنا دي غريبة
كئيبة صوتها سكات
واتقفلت الأبواب
وقلوبنا وياها
واتفرقوا الاحباب
أحياء كما الأموات