حياتي اليوم صحيفة إلكترونية يومية
أقر وأعترف..
أن الحكومة غلبت فينا..واننا شعب مفتري ما بيعجبناش العجب !!
أقر واعترف… أننا سدينا نفس الحكومة اللي عاملة اللي عليها ومش مقصرة في حقنا في حاجة..وتعبت تفرفش فينا وتفرحنا ..حتي يئست مننا ومن جحودنا وكفرنا بنعمتها.!! فاضطرت آسفة لمعاقبة كل من يتسبب في خلق ونشر مناخ تشاؤمي بين أفراد الشعب !!
نعم….أقر وأعترف أننا تحولنا إلي شعب نكدي وليس ابن نكتة !! كما أقر وأعترف… أننا شعب أصبحت ابتسامته شاحبة ونفسيته سوداوية…وبداخلنا سواد مغلي بالدموع…أي باختصار..شعب سماوي النزعة…صفراوي السريرة… بمقياس الحكومة.
صحيح إن الحكومة مقطعة نفسها علينا وياما كان في نفسها تشوفنا علي حياة عينها شعب فرحان وسعيد ومزقطط..لكن ؟؟
إزاي الناس هاتفرح .. وطعم المرار بقي طاغي بعد السكر ما غلي وشح والكيلووصل 10 جنيهات !!
وتلميذ المدارس يتطمن قلبه منين لبكره، ويجتهد ليه ويتفاءل ليه، بعد ما شاف بعينه الغشاش بيقفل الامتحان بالتسريب اوبالمحسوبية !!
ومنين هاييجي الأمل والشباب بيرمي نفسه في البحر من اليأس وهوعارف إن الموت أقرب له من النجاة ..ومن لم يمت في البحر مات من القهر والبطالة والعوزة والحوجة المرة !!
وليه اليأس ؟؟ واحنا علي رأس قائمة الدول في معدلات الإصابة بأمراض السرطان وفيروس سي والفشل الكلوي !!
وليه اليأس… واحنا حتي الكورة خايبين فيها وماوصلناش لكأس العالم من 30سنة !!
وليه فايتنا التفاؤل وعمينا عنه وأصغر سيارة من سوق شرق آسيا بتتباع عندنا ب 150ألف جنيه !!
ولوفكرنا نشتري" بسكليته" هتلاقي تمنها 3 أو4 الاف جنيه !!
ورغم أن الحياة جميلة وتدعو للتفاؤل مثلما رأيتم ورغم كل ما تبذله الحكومة ووزراؤها ومسئولوها من جهود جبارة إلا أن المصريين متشائمون ومش متفائلين عارفين ليه ؟؟
لأن العيب فيك انت أيها المواطن ..لأنك مش وزير في الحكومة.. ولا عضوبرلمان …ولا مذيع توك شو في قناة فضائية !! كنت ساعتها هتعوم علي وش الدنيا وتشوفها وردي والحياة بمبي، وكنت هتشوف بعينك إزاي الجنيه في إيدك ممكن يفطرك ويغديك وإنك بعشرين جنيه تبقي من الأغنياء !!
ومنين نجيب التفاؤل..؟؟
والناس عمالة تسمع عن تعويم الجنيه ورفع سعر الدولار .. والناس لا بتوع اقتصاد ولا هم فاهمين ولا عارفين ولكن مرعوبين من اللي بيسمعوه عن اللي هايحصل في الاسعار !! ومنين نجيب التفاؤل..؟؟ والشكوي من الفساد ملء السمع والأبصار ومع هذا لم نر مسئولا واحدا بيتحاسب ولا حال مايل بيتعدل !!
ألا كله مكفي عليه ماجور .. أوعاملين ودن من طين والتانية من عجين !!
ومنين نجيب التفاؤل يا اهل الله يداوينا .. اللي انكوي بالغلا قبلينا يقول لينا !!
————–
daliagamal2020@yahoo.com
