—-
في الافراح.. تحلم كل فتاة انها لما تتجوز يتعمل لها زفة فيها سيارات كتير.. خمس أو ست سيارات.. كذلك تتجمع في حالات الوفاة أكبر عدد من السيارات لتوصيل المعزين.. تظهر قدر وهيبة عائلة المتوفي بعدد وقيمة السيارات التي تشيع المرحوم في الدفنة والتي قد يصل عددها ١٠ أو 15 سيارة.
ولو كان الموكب لرئيس جمهورية.. فالأمر عادي وطبيعي متبع في كل الدنيا نظرا لأهمية الشخصية وتعدد مرافقيه ولزوم التأمين.
أما بقي لو كنت مدير أمن أي محافظة.. فأنت هاتضرب الرقم القياسي في عدد العربيات بأشكالها وانواعها وهاتحطم حلم كل عروسة بتحلم بزفه كبيرة وهاتكسر أنف كل عائلة تتباهي بعدد العربيات المرافقة للجنازة.. ويمكن تثير حسد المسئولين بالرئاسة.. اللي مش هايقدروا يوصلوا لعدد العربيات المرافقة لسعادة مدير الأمن.. التي تخطت الـ 40 عربية.
ده طبعا غير غيرة وحقد وكراهية المواطنين اللي ماشيين في الشارع حتي لو كانوا بيحبوا الشرطة لأن المنظر هايستفزهم ودوي »سارينة» الإنذار لزوم تشريفة سعادتك ستصم آذانهم وتصيب الجميع بصداع رهيب، ويمكن يصحي الميتين، والناس هاتعد العربيات واحده واحده.
فيا سيادة مدير الأمن إرحم الناس يرحمك ربنا.. »وَلَا تَمْشِ فِي الْأَرْضِ مَرَحًا، إِنَّكَ لَن تَخْرِقَ الْأَرْضَ وَلَن تَبْلُغَ الْجِبَالَ طُولًا» صدق الله العظيم.
عن اللواء مدير أمن »الغربية» اتحدث.
————–
daliagamal7070@gmail.com