حياتي اليوم صحيفة إلكترونية يومية
أخذت تكلم نفسها بصوت عالى غير عابئة بمن حولها من البشر والسيارات…وبدت السيدة الأربعينية وكأنما تهذى فى جدال أشبه بخناقة بينها وبين ذاتها وهى تقول..ما بقتش مجنونة لوحدها…أتاريه ساكت وما بينطقش. ..!! هيقول إيه ويعيد إيه..!! ما هو الجنان طال الكل…!!
واحنا اللى كنا نضحك لما البياع يقول مجنونه يا "قوطه" ونقول آه أصل الطماطم دى بغزالة مرة بجنيه ومرة بعشرة جنيه، دلوقتى هينادى يقول إيه..ولا إيه !! الخيار ب8 جنيه والفلفل الرومى ب9جنيه والكوسة ب8والبامية لما رخصت بقت ب10جنيه والفلفل الملون اللى العيال بتحبه الكيلو ب25جنيه !!!
الجنان طال الكل …هنقول ايه بس.. مجنونة يا قوطه ولا مخبول يا فلفل. ولا بتهزر يا خيار ولا بتتقمعى علينا يا باميه…!! يعنى لا هناكل لحمة ولا فراخ ولا حتى خضار !! نعمل إيه بس يا ربى وناكل إيه ونعيش إزاى؟
اللى عنده عيلين تلاته عاوزين ياكلوا ويشربوا ويلبسوا ويروحوا مدارس، والمدارس مصاريف ولبس وساندوتشات ودروس خصوصية..!! واﻷكل نار والعيشه مرار…والكهربا غليت والفواتير ولعت ، جايين ومتشطريين عالغلابة وسايبين اللى بيقبصوا آلافات مؤلفة، ويقولك أصلهم وضع خاص.. وضع خاص ..وضع خاص !!
والباشوات بتوع الحكومة يقولولك عدالة اجتماعية ،وكل يوم يعملوا قواعد للأجور ويستثنوا منهم ناس ويحطوا سقف للرواتب والدخول ويهدوه على دماغنا !!!
طب ياربى أومال الناس الغلابة يبقوا إيه..!!.
الضرايب بياخدوها مننا ويعفوا أصحاب الملايين ويطلعوهم خسرانين !!
والأراضى يدوهالهم بملاليم الفدان والغلابة يقولولهم المتر بألوفات ..ولما ييجى وقت الجد ولاد الكبار بيطلع معاهم جنسية تانية يسافروا بيها بره البلد ،وولادنا احنا يدخلوا الجيش علشان يدافعوا عن بلدهم ! وفى الآخر مستخسرين فينا حتى الخضار ناكله أو نشتريه !!
واستكملت السيدة خناقتها مع نفسها ..وقد بدأت دموعها تنهمر بغزارة…قائلة : طب يارب نشكى لمين..للريس ؟ هو هيعمل إيه ولا إيه وهيسمع مين ولا مين..! بس إحنا برضه هنعمل ايه ماهو اللى اختار المسئولين بتوعه وهو اللى وافق على الوزرا اللى راحوا واللى جم …وهو اللى سايبهم يبيعوا ويشتروا فينا .وكل واحد فيهم كل همه إنه يطلع نفسه "ميه ميه" ولو قالوله "بم " يطلع يقوللهم "على قلبكم ضربة الدم "!
وأهم قاعدين على قلبنا ،واللى فلح فيهم يقولك أنا عملت منظومة العيش ووفرت اﻷنابيب وكفايه عليا كده!! تيجى تقوله بس اللحمه والسكر والخضار نار..تلاقى التانى يرد يقولك اﻷسعار مناسبه جدا…بس المرتبات هى اللى واقعه !!
وفى الأخر إحنا اللى مالناش اصحاب….نعمل إيه ونعيش ازاى….!! خلاص ياخدوا مرتباتنا مش عاوزينها ويعيشونا هم بقى ، وتورينا الحكومة هاتجيب لنا منين مش عاوزين ناكل لحمة ولا فراح .. نسيناهم و نسيونا تأكلنا بس الخضار اللي مابقيناش قادرين علي تمنه .تعبنا يارب ومالناش غيرك…يا ترحمنا ..يا تاخد الحكومة.
ولا تعليق…….!
