بتنده تعالي وتحسبنى ناسية
وتبعتلى صورتك تبكي عينيا
ومن امتى ناسيه. يا ابويا وقاسيه
وروحك معايا وثانيه بثانية
بتنده تقوللى صبارى كبرت
واجرى التقيها حاضناك بدالى
وكاسية ترابك بريحتك عليها
وانت عارفنى ياابويا بغير
وزعلانه منك
فايتنى لوحدى ف همي اللى زاعق
وامى اللى شوقها وفـ صدورنا شاقق
للهفتها دايما ودايما فعينها بشوفك كتير
يا ناحت ملامحك فقلب الحنايا
لقلبى اللى سمعك تملى يناديك
وزعلانه منك
بترحل وتبعد وتكتب نهاية لفرحة حياتى بضمة كفوفك
ونفسي اشوفك واسرح فشوفك والقى شراعك حاضنى تملي ..وسبنى اشتكيلك ده من يوم وداعك بحارب ف موجة ودوامة بتلف بيّا وبدور وضهرى اللى سنده دراعك ياابويا . حساه ياابويا من غير جدور
وفاكر ياابويا فى ليلة وداعك
منساش عيونك وروحك معايا لحد أما قالوا دى ام لأبوها.. ولما عيونى غفلت ثوانى صرخو وقالوا هاتوها لأبوها.. بايدى ياابويا سبلت عينك ومن يومها بتمنى اقطع ايديا
مبقدرش انسى وتنده عليا وبتقولى بقسى وتزعل كمان واجرى لعندك واقلب فميه تولع فصهدى تزود حنينى
وارويك بدمعى و شوقى وانينى وناره اللى قايده ودخان يلهلب آلام البعاد
مابقدرش اشوفك صورة ف حيطانى خيوطها اللى دايبه تدوب سنينى
وصوتك بيكسر ضلوع المكان
فسامحني ياابا واياك تقولى
بنسى وبقسى وانت اللى قاسي عليا ببعادك
غيابك ده طول ووجعى مطول ونفسي فى حجرك
لحد الممات
ونفسي اضمك ونفسي ياابويا فبوسة لخدك
فسرسبنى عندك تبوسك عينيا
واكون ممنونالك تعبنى ياابويا وجع البعاد