حياتي اليوم صحيفة إلكترونية يومية
مدرسة البنات بتاعتي كلها اتقلب حالها لما عصام اتعين فيها . الناظرة نفسها لاحظت أن البنات الفاشلة اللي كانت بتيجي في الحصة الأولى بقوا اول ناس بتيجي تقف في الطابور عشان يشوفوه الصبح … أنا بقا كنت رائد الفصل ودايما بقف في أول الطابور… هوه دايما كان عنده الحصة الاولى على فصول أول أعدادي اللي صفوفها مقابلة لصفوف تالت اعدادي…طبعا كل البنات كانت بتعمل اي حاجة عشان تلفت نظره ولو حتى تتعاقب وتخرج من الطابور وتقف على جنب بس عشان ياخد باله منها �
بس عصام كان مؤدب جدا مع كل البنات وكل زميلاته اللي كانوا هيتجننوا عليه…ومكنش بيبص غير عليا انا … وأنا طبعا مش واخدة بالي ولا ف الدماغ … أنا كنت طفلة وبتاعة مذاكرة وبس?
وفي يوم كل بنات ثالث اعدادي اتلموا عليا وقالولي انه بيبصلي انا بس فقلت لهم انا معرفش ومش واخدة بالي … فقرروا يعدوا كام مرة هيبص لي في الطابور.. وفعلا تاني يوم وقفوا يعدوا وانا طبعا كنت ميتة من الضحك لما خدت بالي لاول مرة منه، وهو فاكر اني بضحك له … فاكرة كويس انهم عدوا لحد 52 … اه والله العظيم�
المدرسات كانت عمالة تبص مش فاهمة وباقي البنات ماتت من الضحك … ومن اليوم ده بقى أسمه في المدرسة (عصام أمل) بعد ما كان (عصام جغرافيا) ?
في يوم كان عندنا حصة فاضية وجالنا احتياطي … خلى البنت اللي قاعدة جنبي في الديسك تقوم عشان يعرف يكلمني … سألني عن نفسي وحاجات كتير وفي الاخر سألني إذا كنت بسمع ام كلثوم فقلت لأ… فطلب مني اسمع الأغنية دي. بعد ما سمعتها تجاهلته تماما وتجنبته وحاول كتير يكلمني مرضيتش ابدا.
في السن ده كنت بخاف من أي حد يحبني أو يحاول يتقرب مني.. أو يقول لي كلام حلو لاني اتربيت على أنه عيب وميصحش … وأنا مبسوطة اني اتربيت كده.. والا كانت حياتي كلها هتبقى غلطات وصدمات ووقعات صعب الواحد يقوم منها.
أنا مديونة لمستر عصام بأنه خلاني اسمع ام كلثوم وأنه خلاني احس بحاجات لأول مرة حسيتها ف حياتي ?
ولحد النهاردة أول ما اسمع ام كلثوم بتقول " ده الهوا العطشان في قلبي بيندهك … يا أرق من نسمة وأجمل من ملك" …قلبي بيقع !
