الجمعة , 29 مارس 2024

كبسولات مهدئة…(الشخصية النرجسية 3)…تكتبها رشا صيرة

= 3410

الحلقة الثالثة: (اكتشاف النرجسى …!)
النرجسى …هو شخص توقف تطوره النفسى عند مرحلة الطفولة واللى بيدور كل شئ فيها حول رغباته الشخصية …
النرجسى …هو طفل لم تنجح شخصيته فى تجاوز تلك المرحلة اللى شاف فيها هجر وإهمال وفتور عاطفى من الأهل وشعور انه منبوذ ! الأمر اللى أدى إلى جمود فى نضوجه العاطفى ؛؛؛
فكان طفل لا تحترم مشاعره …وكان دايماً حاسس بصعوبة فى التعامل مع اى مشاعر بيواجهها زى خيبة الأمل وحاجته إلى الدعم العاطفى وتلبية احتياجاته سواء المادية أو المعنوية بالرغم من انه كان بيشوف أهله بيلبوا أحتياجات ومطالب أخواته ؛ وده كان بيعمله مشاكل فى علاقته مع أسرته وأمتدت إلى علاقاته بأصدقائه وبعدين تعاملاته فى محيط العمل فيما بعد !
علشان كده فى أوقات كتير كل الأذى اللى بيمارسه النرجسى بيكون إسقاط لمعاناة عاشها فى مرحلة من حياته والأكتر مرحلة الطفولة أو المراهقة …سابت جواه أثر بس ما ظهرش غير لما كبر ! علشان كده لازم تفهم ان اى أذى مارسه النرجسى معاك ده مش بسبب عيب فى شخصيتك ولكن ….بسبب انك تعاملت مع شخص عانى من ألم وجرح ولم يدرك انه فى حاجة الى العلاج وانت كنت (الضحية )!
بس مش كل أضطراب فى الشخصية النرجسية بيتحول إلى شخصية مسيئة ؛؛؛
وده بنعرفه بعاملين :-
العامل الأول …(درجة التعاطف العاطفى):

التعاطف العاطفى هو القدرة على الشعور بما يشعر به شخص آخر أو بنتخيل انه سيشعر به!
ولو أنت تملك قدر كافى من التعاطف العاطفى يبقى أحتمال ان رغبتك فى إيذاء غيرك هتكون قليلة ….لانك على وعى بأهمية شعورهم وهيكون عندك قدر من الأهتمام لألم الغير وأثر أى كلمة بتقولها أو اى فعل بتعمله على نفسيتهم !
وأنخفاض التعاطف بيعمل حالة عكسية علشان كده بنلاقى ناس كتير بتتحول إلى نرجسيين بسبب أنخفاض التعاطف العاطفى اللى بيخليهم يسببون ألم من غير ما يحسوا ولا يراعوا ده لاى شخص بيتعاملوا معاه؛ وده بيخلى علاقاتهم بالناس مش ثابتة !
العامل الثانى …(الثبات العاطفى ودرجة تغيره ):

فإذا بدأت التعامل مع اى شخص على صورة الثبات على( الصورة المثالية ) من غير اى توقع للتغيير هيوصلك لصدمة !
ولكنها فى الأصل نتيجة سوء تقدير وفهم منك ..لانك تعاملت مع قاعدة الثبات وما سمحتش لعقلك أنه يقبل صورة تانية !
النرجسى ….عنده قاعدة بيستخدمها فى الحب
علشان أحبك….لازم تكون كامل
كامل = انك تعمل اللى يرضينى
غير كامل = انك بتعمل اللى مش بيحبه !
فيوصلك ان كل شئ بتحب تعمله طالما مش بيرضيه ! تبقى شخصية مش كاملة فى عينه !
ولما تعمل اللى بتحبه …هيحبك !
فتقع فى فخ سيطرته عليك وللأسف بتديله مفتاح شخصيتك على طبق من ذهب !!

وعلشان تكتشف انك بتحب أو بتتعامل مع شخص نرجسى هتمر بمراحل فى علاقتك معاه
١ – مرحلة المطاردة
بيشوفك وبيوصلك أنك كائن مالوش مثيل ، هيحب كل حاجة انت بتحبها !
حتى عيوبك ..هيخليك تشوفها مواصفات خاصة بيك ( وخلى بالك من النقطة دى علشان دى اللى هتفهمك انه نرجسى !!!
هيخليك تحس أنك شخصية جذابة ويوهمك أنك مثالى ؛ وهيفضل يتابعك ويطاردك فى كل مكان ويهتم بيك ( بالهدايا والرسائل والتليفونات ) واى شئ يثبت إخلاصه الكامل ويثبت ثقتك بيه من ناحيته …
وممكن يبذل مجهود كبير من طاقته ووقته وأحياناً مال كتير علشان يثبت صورته فى دماغك ؛؛؛ فيبدأ يكلمك عن حياته ويحاول يخليك تشاركه فى التخطيط لمستقبله وهيتكلم عن كل الأماكن اللى بيحلم أنك تكون فيها معاه وإذا كنتوا بتخططوا للزواج هيحلم معاك بالأولاد وعددهم وأزاى هتتعاملوا معاهم !
هيشوف حاجات فيك ويسألك عنها وهيفهم انها جزء منك وانك مرتبط بيها وبتحبها ؛؛؛ وهيمثل انه كمان بيحبها وبالنسبة له مهمة وكفاية انك بتحبها أو هتفكره بيك !
وطبعاً كل ده طبيعى ؛؛؛؛

اللى مش طبيعى هو انه هيدخلك فى (عالم الخيال) ولأنك شخص مثالى وكل حاجة بيقولها بيبقى فعلاً نفسك تمر بيها هتفتكر انك محظوظ!!
هيبدأ يحكيلك عن اى حب صادفه فى حياته وانه أصيب بخيبة أمل فى حد عرفه ؛؛
ولو سألته ليه ما كملتش مع حبيبك؟!
هيقولك انه أكتشف انه مختلف جداً عن بدايته معاه ؛؛؛ وانه أتصدم فيه ؛؛؛وانه مش شبهه؛؛؛
مع انه كان بيعمل كل حاجة علشان يرضيه !
وغالباً انت كمان هيقول عليك كده فى الآخر !
وهيقنعك انه أخيراً لاقى ونيس روحه ونفسه وانك فيك كل حاجة كان بيدور عليها وأكتر !وطبعاً انت هتصدق !!!

هتصدق ؛؛؛؛مش علشان انت طيب ولا عبيط … ولكن علشان اللى بيحب عمره ما بيفكر فى سوء الظن ! أو انه يشك فى ان اللى بيحبه او بيعرض حبه ممكن يأذيه بأسم الحب !

٢-مرحلة محو شخصيتك !
هيبدأ يكون فكرة عنك ويلاحظ كل حاجة فيك وبالذات العيوب اللى بتنقص منك واللى كان مفهمك انها مزايا ؛؛؛ وهيبدأ يحول اى صفة فيك كان بيقول عليها رائعة إلى عيب !
ويبدأ يوصفلك فى الصفات اللى نفسه يشوفها فيك بالتدريج !
هيقترح عليك انك تغير طريقة لبسك ، كلامك ، تعاملاتك مع الناس ، وغيرها وطبعاً وهو بيوصلك أحساس أنك لما تتغير ؛؛ حبه ليك هيزيد وانك هتكون أحسن وأفضل من الصورة اللى أنت عليها !
درجة أستجابتك لمطالبه هتكون بدافع الحب وبكده انت خليته يبنى جواك عمود خرسانى قوى من فرض شخصيته مكان شخصيتك ملكته عقد تمليك لشخصيتك وحق أنتفاع لكل حاجة جواك !
هتفضل تستجيب لكل مطالبه وأحياناً ترفض !! هيتهمك انك عنيد وبتصمم على أشياء وأفعال مش هتفيدك ولا هتنفعك ؛؛؛ وكل ما هتقاوم هيوصلك أحساس انه زعلان منك وأعتبرها اهانة لحبه ليك !
هيغضب منك وفى أوقات كتير هيعاقبك ويهملك
وهيبدأ فى المعارك بحجة انك مش بتحبه وهتلاقى كمية أنتقاد لأفعالك غير عادية هتوصل منها لسؤال
( حبيبى اللى أنا حبيبته حصله إيه ؟! )

٣- مرحلة الأذى والإساءة
كل نقد هيتوجه لك هيتعدى حدود الأدب فى أوقات كتير ؛؛؛ والأهانة هتكون صريحة ؛؛؛ ورفض كامل لاى تصرف بتعمله وكره لاى شئ انت بتحبه !
وممكن يوصل لتجرحيك أمام أصدقائك وهيوصل بيه الحال انه ينتقد أصدقائك وممكن يكرهك فيهم علشان يبعد اى تأثير ليهم عليك ويكون هو الوحيد صاحب الكلمة والحق والمتحكم الوحيد فى حياتك !
حياتك معاه هتتحول لميدان معركه هتبقى مليانه خناق ولوم وعتاب وصراخ وبكاء هستيرى !
وتسأل نفسك ده أنا كنت بأحبه عملت أيه !!! علشان أستاهل كل ده ؟!

لو أنت مع شخص وأكتشفت انه نرجسى وبتتعرض لإساءة منه أسأل نفسك لو مريت بكل المراحل التلاتة السابقة
يا ترى ايه درجة أستعدادك لتحمل الإساءة؟!
لو كانت درجة أستجابة قليلة ؛؛؛؛
يبقى لازم تلم اللى فاضل منك وتمشى !
لأنك كده هتكون وصلت لمرحلة

يا تبعد وتخسر كل حاجة وتكسب نفسك !!!
يا تقبل بالأذى وترضى باللى موجود وتخسر نفسك !!!
ودى أصعب معادلة فى الحب ….!
ولو لسة جواك مقاومة وعاوز تكمل يبقى لازم تفهم ان خلاص اللى حصل …حصل
وعلشان تنقذ نفسك لازم تدخل فى مرحلة المواجهة وتفادى الأذى ومحاولة العلاج ( مواجهة النرجسى ) !

شاهد أيضاً

كبسولات مهدئة| عقدة النقص … تكتبها رشا صيرة

عدد المشاهدات = 16571    لما بنلاقى حد بيفتخر بحاجات عنده ، وبيألف قصص نصها …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.