الجمعة , 29 مارس 2024

كبسولات مهدئة…(كلمة حلوة)…بقلم رشا صيرة

= 8959

 

ماجدة الرومى لما غنت لنزار قبانى
كانت بتقول وأعود لطاولتى …
لا شئ معى إلا كلمات !

قد أية الكلام بيريح أوقات وساعات بيكون زى الرصاص !
والأصعب منه لما بتكون بتدور عليه من اللى بيحبك ومش بتلاقيه !
قلوبنا محتاجة اللى يملاها ويحس بكل حاجة منسية جوانا ، ويشوفنا ويوصف كل حاجة فينا ويكلمنا كأننا بنكلم نفسنا !
الحب مش هدفه أنك تأخد كل حاجة من حبيبك بالعكس ؛
انك تعمل شئ واحد بيحبه ممكن يكفيه وأبسطها (كلمة حلوة ) تشجعه وتحفزه ….
أوقات كتير فى وسط يومنا وتكرار كل اللى بنعمله بننسى نجامل اللى بنحبهم “بكلمة ” حتى لو كان على حاجة عملوها وواجب عليهم !
وفى وقت بتحس بعدم آمان وانك مش قادر تعمل حاجة ولا تحقق أى شئ ايجابى فغالبا ً بتكون محتاج لقوة تحرك شعورك فلو كلمة أتقالتلك من حد بتحبه ممكن تخليك تفكر ان العالم كله هيقول نفس كلامه وهيشوفك زى ما هو شافنا !
كأنه سلط نور قوى فجأة علينا خلى كل حاجة جوانا تنور وخلتنا نحب نفسنا وتشجعنا أننا نعمل أى حاجة علشان نثبت كلامه …
الحب هو الرقة ولو كنا هنوصف الحب عن طريق الكلام يبقى لازم نختار أرق الكلمات وأحنها وأوقات كتير بنربط الكلام بنبرة صوت اللى بنحبهم فلو أتقالت بصوت عالى وقاسى عمرنا ما بنحس أنها حب !
أحياناً بنقول كلام مؤلم للي بنحبهم وحتى بعد مرور الوقت مش بينسوه فعلى الأقل نعترف بده ..ونطلب منهم يسامحونا ونعرف أحتياجاتهم اللى تخليهم يحسوا بالأمان وده بأنك تأكدله أنك عاوزه وقابله ومخلص ليه …علشان هو كمان يقدر يديلك ده …
فكلمة حلوة أو رسالة واحدة ممكن تحول حياة شخص من العدم إلى الوجود وتغير حياته من التعب للرغبة فى الحياة ..
ووقتها مش هتبقى مجرد كلمات ….!

شاهد أيضاً

كبسولات مهدئة| عقدة النقص … تكتبها رشا صيرة

عدد المشاهدات = 16565    لما بنلاقى حد بيفتخر بحاجات عنده ، وبيألف قصص نصها …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.