حياتي اليوم صحيفة إلكترونية يومية
دي حكاية تستحق تتعرف لإن للأسف حظنا الوحش ماخلاناش نعرفها رغم أهميتها مع إن ليها صدى بره مصر.!.
فيه فريق مكون من 3 طلبة مصريين بيدرسوا في قسم الميكانيكا كلية هندسة في الجامعة البريطانية عملوا حاجة عظيمة قريب وللأسف مش كتير يعرفوها بس تستحق تتعرف.. “نرمين صبحي”، “أحمد مجدي”، و”محمد العايدي”؛ 3 شباب زى الورد صمموا ذراع صناعي وزنه خفيف بيتم زراعته للأشخاص اللي حصل لهم بتر بسبب حادثة أو بسبب مرض السكر من غير ما يحتاج للتدخل الجراحي!..
طب وإيه يعني ما الأطراف الصناعية موجودة في كل مكان!..
لأ.. الطرف اللي صمموه الشباب بيتم التحكم فيه عن طريق توصيلة صغيرة بتتلبس في الراس وبترسل إشارات من المخ للطرف الصناعي وبتخليه يتحرك بسهولة ويسر وسرعة!..
حاجة تانية مهمة في تصميمهم وهو إن الطرف مش بيشتغل بـ ماتور زى ما بيحصل في معظم الأطراف اللي بتتباع لكن عن طريق ضغط الهوا وده بيخلي الحركة بتاعته سهلة ووزنه أخف بكتير..
الشباب دول فازوا بالتصميم بتاعهم بالمركز التاني في مسابقة أبو ظبي للبحث الافتراضي للطلاب على مستوى الشرق الأوسط وإفريقيا ضد 315 مشروع اتقدموا من 87 جامعة، وكمان شركة Dell العالمية اختارت مشروعهم من أفضل 10 مشاريع في العالم!..
حياة كام حد ممكن تتغير بسبب فكرة زى دي؟.. ملايين.. والسبب؟.. بعد ربنا؛ ٣ شباب مصريين.. نماذج زى دي بتخليك متأكد إن بلدنا فيها شباب مصري يفرّح ويبسط ويفتح النِفس وإيديهم تتلف في حرير ومخهم ألماظ.
