حياتي اليوم صحيفة إلكترونية يومية
عام هجري مضى…
مش مجرد أيام عدّت وخلاص
ده عمر اتكتب…
في كتابك بين السطور
حرف بحرف… ونَفَس بنَفَس
كل ضحكة ليك… محسوبة
وكل دمعة… شاهد عليك
كل خير عملته… باقي
وكل ذنب… لسه مستنيك
اتقفل العام…
بس ما اتقفلش في كتابك
إنت فاكر إن الزمن بيعدّي؟
لا…
إنت اللي بتتسحب منه حتة حتة
السنة اللي فاتت…
خدت ناس… ما رجعوش
وخدت فرص… ما تتعوضش
وسابتك… بنفسك القديمة
بتقول: “لسه بدري”
طب امتى؟
لما الصفحة تقفل؟
ولا لما اسمك يتقري في خانة الغياب؟
الهجرة مش قصة اتحكت
ولا سيرة بنقولها وخلاص
الهجرة قرار…
إنك تسيب اللي إنت متعود عليه
حتى لو هو إنت
تخلع جلدك القديم
وتواجه نفسك من غير تزييف
اهجر ذنبك…
بس الأول اعترف إنك بتحبه
اهجر ضعفك…
اهجر خوفك…
اهجر كل حاجة بتبعدك
الهجرة مش مكان…
الهجرة إنك ترجع
وترجع بجد
السنة الجديدة مش رقم
ولا تهنئة وخلاص
دي فرصة…
تمسح صفحة… وتبدأ من جديد
بس خد بالك…
مش كل بداية… نجاة
ومش كل تأخير… رحمة
في ناس بدأت سنة جديدة…
وهي أصلاً كانت خلصت
بس لسه عايشة…
عشان تتحاسب زيادة
ويمكن…
سطر واحد صادق
يمحي صفحات تقيلة
فاسأل نفسك…
قبل ما تقول “عام سعيد”:
إنت داخل سنة جديدة؟
ولا داخل… على آخر صفحة؟
كل عام هجري… وكلنا أقرب إلى الله
