حياتي اليوم صحيفة إلكترونية يومية
—
المعاناة أمر سيء جداً …والحياة نوع من أنواع المعاناة …الغنى بيعانى من غناه …والفقير بيعانى من فقره ..والمريض بيعانى من مرضه …واللى عنده أسرة بيعانى من مشاكل أسرته …واللى ماعندوش أسرة بيعانى من وحدته ..
وده مش معناه أن أنواع المعاناة متساوية … لكن فى معاناة أشد ألماً من معاناة أخرى …ورغم ده لازم كلنا نمر بالمعاناة …
وفى وسط المعاناة كل واحد بيتمنى ان يطلعله عفريت من المصباح السحرى يرحمه من المعاناة اللى بيعانى منها …ويحل كل مشاكله أو يفتح عينه على حقيقة ما يعانى منه علشان يقبله !
ده ممكن يكون رائع ومزعج …حزين وضرورى فى نفس الوقت !
علشان كده لازم تتعلم تقول لنفسك: أنا أعانى لكن …لسبب بسيط هو أن المعاناة أمر مفيد لانها ممكن تكون حلقة الوصل بينى وبين الطبيعة علشان أتغير وانى أبذل قدراً أكبر من الجهد والعمل فى سبيل التجديد والتغيير علشان أحافظ على بقائى …
عادة ما يكون أعظم الحقائق فى الحياة أكثرها أزعاجاً عندما نسمعها أو نمر بها.
