الفُرقة بتدبح صدري يا ريما
واللُقا بَخلان.. وكريمة إنتي
إزاي بس يقولوا بعيدة
مع إن بعادك عن قلبي
ميجيش سنتي !
دلوقتي..
بعد أما غِلبت .. وغَلبت فيا الأيام
والعالم وَلع فيا وفـ الأعلام
وسِبنا الهم ورانا أكوام
لو قولنا هنحسب من تاني !
تفتكري الحِسبة هتطلع كام ؟
شوفي كام مِسا فات بِنّا
شوفي كَم المسافات بِنّا
العمر أهو عَدي وفات بِنّا
كهربنا البُعد و100 عَداد
وبقينا بنغرق فـ الأعداد
واهو ده عيبنا !
بنقدف خايفين مـ الشَط
وفـ المحيط غرقان قاربنا !
دلوقتي يا ريما ..
الكذب مطلعش جريمة
الصدق جريمة
كان لازم أفهم
إن الكون إختلفت معاييره
وطريقنا .. رغم إنه طريقنا
لكن هيغير سيره !
كان لازم افهم اننا فـ القرن الواحد والعشرين
وان احنا السبب الاول ف الخوف والدم وقتل شيرين..
وإدينا بنتطوح فـ العالم ومجازره
كان قصدي العالم يتقسم بالعدل علينا
معرفش إزاي جايبين جَذره !
قاطعين جِذره
والنفط هيخلص زي الحُب
يوسف راح يبقي عزيز
من غير الـ جُب
والشاعر هيكمل عادي
لو مات مـ الشوق حتي
بكرة يجيب من نن الشمس 200 حِتة !
ويلون كل العالم على كيف كيفه
عنترة راح يرجع ويحارب عبلة
من غير سِيفه
وجميل هيكمل من غيرك يا بُثينه
كلثوم هتموت م الشوق وتقول
خُد عمري كله .. إلا كام ثانية..
ومي هتستني جوابات جُبران
بدموع سايلة
وأهو قيس راجع هيعيش ويكمل..
وتموت ليلي !
ليه فـ كل القصص الغرامية
بيحب الشاعر!
ويحن الشاعر!
ويموت الشاعر!
وإن عاش هـ يعيش بقصايده يعاني ..
علشان كده
بكتبلك النَص ده
ومفيش شاعر هيموت تاني..