حياتي اليوم صحيفة إلكترونية يومية
اوعى حد يشتتك عن طريق رسمه ربك ليك،
واوعى حب يهدمك وتضيع عمرك بإيديك،
واللي يحاول يكسرك أو يقلّل من مقامك،
اطرده من غير جدال وخلي الكرامة قدامك.
اوعى تاكل غير حلال مهما ضاقت بيك الأيام،
ولما تعاشر ناس كتير هتعرف معدن الخلق تمام،
مين ابن أصول وقت الشدة،
ومين شيطان لابس وش السلام.
وانسى اللي أذاك لو حبيت ترتاح وتنام،
بس ما تنساش الوجع،
خليه درس وعلامة في كل مقام،
يبقى معيار لكل خطوة،
ويفوقك قبل أي اندفاع أو أوهام.
اوعى تقول ده صاحبي وسري عنده في أمان،
ولا تقول ده قريبي والدم بينا ضمان،
أصل العِشرة في الزمن ده بقت رخيصة وهوان،
وساعات أقرب الناس ليك…
يبقى أول واحد يبيعك بثمن كمان.
خلي سرك بينك وبين ربك،
والنعمة مهما علت بيك خبّيها،
مش كل عين تتمنى الخير،
وفي ناس من نظرة تطفيها،
زمان بقى مليان قلوب مريضة،
تشوف فرحتك وتتمنى تنهيها.
واوعى تضيع صلتك بالله،
دي الحصن والستر والأمان،
دي باب النجاة وسط الفتن،
ونور القلب في وقت الأحزان ،
شياطين الإنس بقوا أكتر من الجن،
في زمن قلّ فيه الوفا والإحسان.
امشِ مستقيم وسيب الخلق للخالق،
ولا تمد إيدك إلا لرب الأكوان،
اللي يتمسك بحبل الله عمره ما يضيع،
ولو اجتمع عليه ألف شيطان.
