حياتي اليوم صحيفة إلكترونية يومية
إلى نص الكلام :
لما تكون قاعد قدام التليفزيون ومدد رجلك على كنبة الأنترية ويتقزقز لب وبتشتم الرئيس السيسي وتقول هو عمل أيه يعني ..
بص حواليك هتلاقي في شقتك كام جهاز تكييف وكام تلاجة وديب فريزر وكام نجفة فيها كام لمبة كلهم الحمد لله شغالين .. افتكر الأيام السودا لما كانت الكهربا بتقطع اكتر ما تيجي .. ركز كويس وافتكر رئيس الحكومة أيام الاخوان هشام قطونيل اللي توصل لحل عبقري للأزمة وطالب الشعب المصري بارتداء ملابس قطنية عشان بتشرب العرق ..
لما تاخد حصتك في العيش وفرق العيش والتموين بكارت الكتروني وأنت واقف محترم وتجيب أي سلعة محتاجها .. افتكر لما كنت بتروح الفرن يقولك صاحب الفرن اللي كان بيبع الدقيق في السوق السودا خلصنا رغم أن الساعة بتكون لسه 12الظهر .. أو بتاع التموين اللي كان يحدفك في وشك بقزازة زيت معفن أو كام كيس سكر وفي الغالب كان الزيت بيتسرق ويتباع لبتوع مطاعم الفول والطعمية ..
لما بتلاقي انبوية البوتجاز وبسعر كويس .. افتكر لما كنت بتقف في طابور 2 كيلو عشان تقدر تاخد اسطوانة واحدة وأحيانا بتكون الكمية اتسربت للسريحة يتاجروا بيها بأضعاف ثمنها ..
لما بتدخل أي بنزينة وتمون عربيتك في دقيقة .. افتكر لما كنت بتقف بالساعات عشان تعرف تحط كام لتر تمشي العربية كام كيلو .. وفي الغالب مكنتش بتلاقي بعد ما تعمل كام خناقة في الطابور الطويل .. وكنت هتلاقي لتر واحد أزاي ومرسي وعصابته كانوا بيودوا البنزين لعصابة حماس في غزة ..
لما تكون راجع مع ولادك في ساعة متأخرة وأنت مش قلقان وتركن عربيتك تحت بيتك وأنت مطمن أنك تلاقيها الصبح.. ابقى افتكر لما كان البلطجية "بيثبتوا" الناس في الشوارع والطرق وبيسرقوا العربيات عيني عينك وبياخدوا إتاوة عشان يرجعوها ..
لما كل مريض بفيرس "سي" دلوقتي يتوفر له العلاج .. افتكر لما كان المرضى بيتسولوا العلاج من موظفين ميعرفوش ربنا ومن مسئولين مستهترين بوجع الغلابة ..
لما تلاقي مشاريع في قناة السويس والطرق والبترول والزراعة والصناعة وغيرها .. افتكر لما الجاسوس محمد مرسي افتتح مشروع الإسكان بمحافظة سوهاج اللي افتتحه الرئيس مبارك عام 2005 .
لما يكون عندك برلمان – صحيح مش هو اللي كنا بتمناه – بس بكره هيكون أفضل في الدورة الجديدة .. افتكر الاعلان الدستوري العبقري للجاسوس مرسي اللي بيحصن قرارات رئيس الجمهورية، ويجعلها نهائية ونافذة، ولا يمكن وقف تنفيذها أمام أي جهة قضائية ..
لما تلاقي زعيم وطني مخلص يحافظ على هيبة جيشك في منطقة الشرق الأوسط وتسليحه بأقوى الأسلحة ويكون رادع لأي معتد يفكر في المساس لو بشبر من أرضك .. أبقى بص حواليك شوف ليبيا والعراق واليمن بقى حالهم أيه ومصير أهاليهم أيه .. لو عاجبك الحال روح هناك..
لما ترجع مكانة مصر الدولية والإقليمية والعربية وتشوف الاستقبال الكبير للرئيس السيسي في كافة دولة العالم .. ابقى افتكر الجاسوس مرسى لما راح روسيا أول واستقبله في المطار موظف بدرجة وكيل وزارة ..
أيوه الأسعار زادت .. والدولار ارتفع .. بس ركز شوية وشوف مين مصلحته يدمر الاقتصاد المصري ويشوه أي إنجاز للرئيس السيسي .. هنتحمل أيوه عشان بلدنا ونقف مع رئيسنا .. بكرة مصر هتكون أحلى .. وهتكون أد الدنيا .. تحيا مصر .. تحيا مصر .. تحيا مصر ..
