حياتي اليوم صحيفة إلكترونية يومية
نفسى أكتبلك قصيدة
كل كلمة فيها بــِكر
ليكى أنت بس حِكر
لمَّا تنسينى حبيبتى
تصبح التذكار وفِكر
..
نفسى أكتبلك قصيدة
دون جميع التفعيلات
ضحكة تشرح تعليلات
لمَّا عينك راح تشوفها
تفهميها بتحليلات
…
نفسى أكتبلك قصيدة
كل حرف بألف معنى
وزن كلمة عزف مغنى
لو قراها حد غيرك
راح تصيبه ألف لعنة
…
نفسى أكتبلك قصيدة
فى الجمال ماليها زى
كل نقطة تشع ضى
لو قراها حد ميت
نبضه يرجع تانى حى
..
نفسى أكتبلك قصيدة
دون حروف الأبجدية
ليكى أنتى تكون هدية
لما تقريها حبيبتى
تطرح الأزهار ندية
..
نفسى أكتبلك قصيدة
بس من غير الكلام
دون دراسة أو علام
لما تقراها شفايفك
تمحى م الدنيا الألام
..
نفسى أكتبلك قصيدة
بشكل تانى ولون جديد
ع الورق ينبض وريد
من حرارتها يا روحى
تمحى م الدنيا الجليد
..
نفسى أكتبلك قصيدة
بالرموز ويا الإشارة
تجلب الفرحة وبشارة
لو قراها حد غيرك
الخشب يصبح نشارة
..
نفسى أكتبلك قصيدة
تنقرى ف كل اتجاة
تبقى مركب طوق نجاة
اللى يقراها بهدووووء
يمتلك منصب وجاه
….
نفسى أكتبلك قصيدة
بالدهب عنبر وطيب
لو قراها مريض يطيب
حتى لو إبليس سمعها
يبقى واعظ أو خطيب
….
نفسى أكتبلك قصيدة
لمَّا تقريها تغنى
والنجوم ترقص بفنى
والكلام منك يضيع
لو بعدتى ف مرة عنى
…
نفسى أكتبلك قصيدة
تنكتب فوق الحيطان
من جفاف تروى الغيطان
لو قراها أى حاسد
ينحرق زى الشِيطان
…
نفسى أكتبلك قصيدة
فيها ابداع وابتكار
تبقى للعشق احتكار
ماكتبها أى شاعر
مهما قالوا ابن كار
…
نفسى أكتبلك قصيدة
خالية من كل العيوب
يبخروا بيها الجيوب
لو قراها لص سارق
ينكسف منها ويتوب
…
نفسى أكتبلك قصيدة
يعلقوها ع البيبان
تنغزل منها التيبان
لو قروها ف أى حتة
كل شئ تايه يبان
…
نفسى أكتبلك قصيدة
تملا ريحة الكون عبير
سرَّها يفضل فى بير
سرَّها بالحبر غامض
لو جابولها ميت خبير
…
نفسى أكتبلك قصيدة
منها نار غيرتك تهب
قلب لو مكسور يحب
لو لمسها فرع ناشف
تلقى خضرة فيه تشب
…
نفسى أكتبلك قصيدة
فوق حرير أبيض يشف
كالنجوم بتدور تلف
لو ف يوم منك تضيع
البحار تفضى وتجف
…
نفسى أكتبلك قصيدة
تمسح الدمع وبكاكى
ننبهر منها لحكاكى
لو قراها الديك يبيض
والأسود ترقص تكاكى
نفسى أكتبلك قصيدة
تخلى طول الكون دا عرض
والسما تحسد فى أرض
لو قراها مين مقصِّر
عمر يوم ما يسيه فرض
…
نفسى أكتبلك قصيدة
تبقى قصة واحلى سيرة
تلقى لغز الشعر حيرة
وربة الأشعار بذاتها
لو قرتها تحس غيرة
نفسى أكتبلك قصيدة
كل كلمة بألف نَص
قلبى بيها ليكى خَص
اللى أعمى راح يشوف
لو بعينه ليها بَص
…
نفسى أكتبلك قصيدة
منها قلبك راح يحِن
لو قراها مرة جـِن
يمشى خايف تحت حيط
ويهدا فوراً يستكن
