حياتي اليوم صحيفة إلكترونية يومية
انا مش كلمة مسطوره
وبادئه ف جملة منسية
مانيش درويشة بتوضى بوجع ليا
انا إنسية مش عرفانى من اصله
حكاية بتتحكى عافية
بفضفضها واتوه فيها
واكدب روحي بالعافية
واتحجج حجج كافية
بتسكرني ف ليل مقتول
وشوش للخلق ليه دايما مع المجهول
بتتلون ومين مسؤل
بيوعدنى ف ليل بكرة
يكون اجمل وفالمجمل
ماعدتش نهار قمر منهوب
وصوت للحق متسرمح
يشد ضفايري باالقوة
وصاحب عشرة ليه قشرة
كواني كى
واقول قلبى هيندهلى
واجيله جري
يلف يروح ويسحبنى
ف كوكب سكته دايبه ..
باكون هايبة ملامح ارض تشبهنى
مافيش علامات
سراب احلامي ليه خايفة
و ده المكتوب..!!
أكون بطلة بدور كومبارس
على المسرح مافيش انفاس
لسان أخرس يقول كلاكيت للمشهد
بتتر البطلة فيه بتموت
وع اليوتيوب
موسيقى توجع الجمهور
ديكور دبلان
اضاءة زفت خلتنى مانيش باينه
مدارينى جدار من طوب
خلاص يادنيا بلا قافية
مافيش كلاكيت ولا هنعيد من الاول
فمشهد روحي فيه بتموت
خلاص عارفانى مين هى
انا هى اللى منسية
وكات طيبتى سبب خيبتى
زمان ارعن بواقى لعضم تتفرعن
ما مات يوسف ومات ايوب
وكل الانبيا ماتت
ماعدتش لحبري لون واحد
خلاص غامق فدنيا فيها نتسابق
مافيش اول ولا تانى مافيش فارق
مافيش كسبان
ياليل حيران مع حكايتى
خلاص قلبى اللى كان مخدوع
نوى يقطع حبال الموج
عصا موسى خلاص ضاعت
ماعدش فى سحر هيأثر
يادنيا عمرى آخره الدود
وليه ف بحرك ده عومي عوج
وانا اللى كنت بنفكر
وناويه فيكى قال نكبر
فشيلتى الشط من بحرى
وغرّقتى كمان روحى
وانا بسأل وجاوبينى
وامتى ترجّعى روحى
بلون قلبى اللى كان اخضر
——–
* من ديوان “ضفاير عشق”.
