حياتي اليوم صحيفة إلكترونية يومية
—-
كله انتهى وساعة الغروب
فاردة قلوعها فالسما
والنخلة مايلة بحزنها
والشمس خايفة يبان لها
من تانى ضي
ياهل ترى يا بكرة جي
والبحر يسكت ما يناديش
قلبى اللى صدّه بألف شيش
واخلَعنى من جوة التابوت
واقطف بيدى …عناقيد لتوت ولو هموت
ماندهش تانى لخطوتك
و بكرة انام
واصحى واعيش
الفين سنة مروا ف عام
ده انا قلبى عام
جوة المحيط
وف كل موجة يقابله حيط
وانشق حلمى والضلوع
كان حلم رافض للخضوع تعويذة ساحبة جتتى وكأنه سحر مابيفارقش
خلاص بقا مش هشتكى
من تانى هجر
ولا شوقى يزعق فالطريق ويرد قلبى للهفتى
. بس اسكتى
كان قلبه صخر
ولوعتى حصالحها
واحضن صبرها
واستنى فجر يروحلها
خلاص هشوف تانى النهار
وارسم خطوط اسراب نوارس ع الشطوط وامواج بتنده للربيع يجي بقا
تعبت من كتر الكلام
ياهل ترى
لما اصحى من حلمي الغريق هنفسره
واديله قبلة الحياة
قلبى يفوق وينتعش
ولا وعودك ليا غش
وتفوتلى قلبى بيرتعش
ماهو انت يا حلمى البرئ ليك الف وش
