حياتي اليوم صحيفة إلكترونية يومية
السعادة الزوجية مش مسؤلية طرف واحد، بالعكس الزواج شركة، والحرص علي نجاح الشركة دي بيكون مسؤلية الاطراف المشاركة، وهما الزوج والزوجة.
بالنسبة للزوجة، خليكي عارفة كويس ان سعادة الراجل مش دايما في لبسك أو الميك آب، اوقات بيكون محتاج عقل يكمل عقله، وتفكير موازي لتفكيره، يعني مثلا اغلب الستات بتشتكي من ترك ازواجهم البيت طول الوقت وتواجدهم مع اصحابهم، يعني اكيد صحابه مش عاملين ميك اب ولا لابسين لبس مختلف عنه، انما بيفكروا زيه واهدافهم واحدة ، ومرتاحين مع بعض، عشان كده بيكملوا بعض..
يعني مثلا، حاولي تقللي كلامك عن مصروف البيت شوية، وعن الضغوط اللي انتي بتتعرضي ليها، لأنه هو كمان بيتعرض لضغوط برا، واتكلمي عن الكورة مثلا! اساليه شفت الماتش؟ وبلاش العتاب المتكرر.. دايما برا ودايما سايبنا ودايما ودايما.. احمدي ربنا اصلا انه دايما مع اصحابه مش مع حد تاني، وجربي تنسي انك المضغوطة، المظلومة، المنسية..
خليكي علي باله بطريقتك، خديه من اصحابه بأسلوبك، وابقي انتي اصحابه، وعلمي ولادك يبقوا اصحابه، ميبقوش ولاده الاشقية، اللي لما بيقعد مش بيبطل اقعد واسكت..
وعلي فكرة جانب النظافة مهم جدا، وبيزيل الطاقة السلبية من البيت، مع تغيير اماكن الاثاث والتحف من مكان لآخر كل فترة، وده بيجدد شكل البيت في عينيه، وبيخليه مرتاح في البيت، ومتسيبيش نفسك لواحدة معرفتش تعيش، وتيجي تقولك الرجالة كلهم واحد، والرجالة ملهمش إلا العين الحمرا…وإلخ، وفرجيها انتي الستات اللي عرفت تعيش مبسوطة مع جوزها وولادها ..
متخافيش ابدا من راجل بيحب اولاده، لان ده سبب كافي انه يتمسك ببيته، وواجبك ان تربي اولاده عشان يحب ولاده بيكي.
وبالنسبة للزوج، شيل من بالك ان الست مخلوقة عشان تخدم وتاكل وتشرب وتخلف وبس، وحقوقها هي اللي انت بتتفضل عليها بيها، لا جرب تعاملها انها بنت من بناتك او اختك، وليها نفس حقوقها، جرب تسعي انك تريح بالها، جرب تشغل بالك بسعادتها، اعمل وقت لشغلك، ووقت لرفاهيتك مع اسرتك، ووقت لاصحابك برضه..
حاول تشوفها نصك اللي له نفس متطلباتك من اهتمام وراحة وحب، بل ويمكن هي الاضعف، يعني هي النص اللي محتاجك، ومش هيكمل غير بيك، بلاش تشوفها حد تافه، وتفكيره محدود..
شوفها بآدميتك وانصافك، متشوفهاش بعين المجتمع الحافظ ومش فاهم، متشوفهاش بعين اصحابك اللي بيحكولك عن زوجاتهم ويقولولك كلهم صنف نكدي، واعرف ان البذرة منك والرعاية منها، انت تزرع وهي بتكبر الزرعة، فمتزرعش نكد وتزعل من الاكتئاب اللي هتعيشك فيه..ونصيحة مني، ابدأ انت متحكمش عليها قبل ماتحاول معاها.
وانت يا عزيزتي الزوجة..سر السعادة الزوجية في انك تحمدي ربنا علي الحاجة الحلوة اللي في جوزك، لأن محدش كامل حتي لو حاجة حلوة وعشرة لأ، علشان فيه غيرك عندها العشرة ومحتاجة للحاجة اللي عندك!
وانت يا عزيزي الزوج..سر السعادة الزوجية في انك تشوف زوجتك زيك، مش اقل منك، وساعتها هتديها قدر احترامها، وهتشوفها تستحق كل جميل..
اسعدوا بيتكوا عشان تخرجوا جيل علي الأقل غير مريض نفسيا، او عنده احساس بالنقص، وكل واحد يبدأ يعمل اللي عليه قبل ما يطلب اللي ليه..ساعتها هتلاقوا حاجات كتير هتتصلح!
