برغم حرقة الدم شكرا لكل رجال منتخب اليد حتي لو اتعادلتم مع البرازيل ومش هاتقدروا تتأهلوا
ده الفريق الوحيد اللي بيزود الادرينالين في جسم البني آدم
دايما نكسب ونتنكس آخر ٥ دقايق
بس شهادة لله عمرنا ماتابعنا ماتشاتكم في التأهيل للاوليمبياد لإننا عارفين إنكم هاتوصلوا هاتوصلوا
عمركم ماحرقتم دمنا في ماتشات تصفيات كأس العالم لإنكم هاتوصلوا هاتوصلوا
عمرنا ماشيلنا هم أي فرقة بتلاعبوها في الشوط الاول مهما كانت لانكم متخصصين تكسبوا أي فرقة لمدة شوط حتي لو كانت بطل الكون
طول الوقت بنعاملكم علي انكم ابطال الكرة الارضية وهاتكسبوا أي حد حتي لو الخصم ميزانيته قدكم ٢٠ مرة وبيتدرب في اي مكان وبأي إمكانيات بيطلبوها
طول عمرنا عندنا يقين إنكم تتفوقوا في لعبة أباطرتها دول اسكندنافيا السويد والدنمارك ده غير المانيا وفرنسا يعني أكثر دول العالم تقدما وبتقاوحوا مع أي حد فيهم وبتحرجوهم والله العظيم
فيه دول عشان تبقي زيكم بتشتري لاعبين بملايين الدولارات وتجنسهم وفوق البيعة مشجعين
شكرا علي لحظات الامل اللي بتمنحوها لينا
شكرا لكل لاعب كرة يد ساهم في تكوين شخصية المصريين
شكرا لأشرف عواض وجوهر نبيل وحمادة النقيب والروبي واحمد العطار لحد جيل احمد الاحمر
شكرا لكابتن يحيي السيد أكثر واحد حس بالادرينالين عين واتحرق دمه وهو بيذيع ماتشاتكم!