حياتي اليوم صحيفة إلكترونية يومية
قرب .. جرب… أوعاك تهرب
خدلك .. فكره .. وبلاش تغضب
وأوعى .. تفكر .. لحسن تتعب
خدلك فكره عن الإنسان
إزاى يبقى بلسان عقرب
ينهش فى أخوه الغلبان
لو طال من دمه راح يشرب
قرب .. جرب… أوعاك تهرب
عامل شهم وهو جبان
وف ضهرك يتحامى ويضرب
زى الحيه أو التعبان
لما تشوفوا قوام تتكهرب
قرب .. جرب… أوعاك تهرب
آدى بشر م الخلق كمان
لابسه وشوش وبينا بتلعب
لابسه التقوى والإيمان
لكن من جواها بترعب
قرب .. جرب… أوعاك تهرب
واللى ياخويا عامل غلبان
أو مسكين وحالته بتصعب
أتاريه البيه م الأعيان
لجيوبنا بيخض ويحلب
قرب .. جرب… أوعاك تهرب
آه من ألاعيب الإنسان
منها العقل ياناس يتعجب
لو قولنا دا تفكير حيوان
الحيوان مننا راح يغضب
قرب .. جرب… أوعاك تهرب
